‘पोशाख आरामदायी आहे’, असा वरवरचा विचार करून तमोगुण वाढवणारी जीन्स पँट परिधान करण्याऐवजी सात्त्विकता वाढवणारी वेशभूषा परिधान करणे सर्व दृष्टींनी अधिक लाभदायी !

युवकांनो, जीन्स पँटचा दुष्परिणाम जाणा !

 

‘रिप्ड जीन्स’ नावाची विकृती !

फॅशनच्या नावाखाली फाटक्या जीन्स परिधान करणारी भारतातील नतद्रष्ट युवा पिढी ! हिंदु संस्कृतीत फाटके कपडे वापरणे असांस्कृतिक समजले जाते; मात्र पाश्‍चात्त्य संस्कृतीत त्याकडे ‘फॅशन’ म्हणून पाहिले जाते ! फुटक्या वस्तू आणि फाटलेले कपडे वापरणे हे अध्यात्मशास्त्रीयदृष्ट्या चुकीचे असल्यामुळे त्याचा व्यक्तित्वावर नकारात्मक परिणाम होतो !

फाटलेले कपडे परिधान करण्याची टूम (फॅशन) सध्या झपाट्याने प्रचलित होऊ लागली आहे. ‘जीन्स’ कापडाची फाटलेली विजार घातलेले तरूण-तरुणी शहरासारख्या ठिकाणी हमखास पहायला मिळतात. सध्या तर याचे प्रमाण इतके वाढले आहे की, मुंबईत ‘जीन्स’ची विजार घातलेल्या प्रत्येक ३ व्यक्तींपैकी एकाची विजार ही फाटलेल्या कापडापासून बनवलेली असते किंवा ती बनवल्यानंतर फाडलेली असते. याची लागण ग्रामीण भागातही लागली आहे. लहान मुलांच्या कपड्यांच्या दुकानातही या ‘रिप्ड जीन्स’ चढ्या किमतीत मिळू लागल्या आहेत. आताआतापर्यंत आपल्या संस्कृतीत परिधान केलेल्या कपड्याला एखादे छिद्र असणे किंवा कुठेतरी थोडेसे फाटलेले असणे अयोग्य आणि असभ्यतेचे लक्षण मानले जात असे. कपडे परिधान करणार्‍याला सुद्धा याविषयी लज्जा उत्पन्न होत असे. त्यामुळे कपडे जुने असले, तरी ते कुठे फाटलेले नाहीत ना, याविषयी विशेष सतर्कता घेतली जात असे. आता मात्र ‘फॅशन’च्या नावाखाली फाटलेल्या कापडापासून बनवलेले कपडे सर्रास वापरले जात आहेत. ज्यांनी न फाटलेल्या विजार खरेदी केल्या आहेत, त्यांपैकी काही जण विजारींना नंतर छिद्रे पाडतांना दिसतात. तरूणांसमवेत तरूणींची संख्याही यामध्ये सारखीच आहे. काही मोजक्या महाविद्यालयांमध्ये या ‘रिप्ड जीन्स’ना अनुमती नसली, तरी बहुतांश खाजगी कार्यालयांमध्ये आणि महाविद्यालयांमध्ये यांवर प्रतिबंध नसल्यामुळे हळूहळू याकडे ‘स्टेटस सिंबॉल’ म्हणून पाहिले जाऊ लागले आहे. फाटलेल्या विजारी परिधान करून पायांचे प्रदर्शन घडवणार्‍या आणि तरूणांमधील लैंगिक भावना उद्दीपीत करणार्‍या या पाश्‍चात्त्य विकृतीने तरूण-तरुणींवर चांगलीच भुरळ घातली आहे. काही तरुणी हल्ली खांद्यावर फाटलेले पोषाख घालतात, तर काही मध्ये मध्ये भोके असलेले पोषाख घालतात. हाही याचाच प्रकार आहे.

फुटक्या वस्तू आणि फाटलेले कपडे यांमधून मोठ्या प्रमाणात नकारात्मक स्पंदने प्रक्षेपित होत असल्याने त्यांचा वापर करणार्‍या व्यक्तीच्या मनावरही त्याचा दुष्पपरिणाम होतो. त्यामुळे अशा वस्तूंचा वापर करणे आध्यात्मिकदृष्ट्या चुकीचे आहे. महाविद्यालयात ज्ञानार्जन करण्यासाठी जाणार्‍या आणि कार्यालयात बौद्धिक कामे करणार्‍या व्यक्तींची यामुळे हानी होऊ शकते. इतरांपेक्षा आपण काहीतरी वेगळे परिधान केले आहे, हा विचार व्यक्तीतील अहं वाढवण्यासही साहाय्य करतो. परिणामी फाटक्या कपड्यांचा नियमित वापर करणार्‍या व्यक्तीच्या व्यक्तीमत्त्वावर कालांतराने नकारात्मक पालट होऊ शकतो. त्यामुळे याविषयी अधिक संशोधन करून तरूणांमध्ये जागृती करण्याची आणि या पाश्‍चिमात्य विकृतीला हद्दपार करण्याची आता आवश्यकता निर्माण झाली आहे.

– श्री. जगन घाणेकर, मुंबई

 

देहाभोवती त्रासदायक स्पंदनांची निर्मिती करणारी असात्त्विक जीन्स पँट घालू नका !

‘जीन्सची पँट तम-रज प्रधान असल्याने ती परिधान करणार्‍या व्यक्तीच्या देहाभोवती त्रासदायक स्पंदनांची निर्मिती होते आणि वातावरणातील नकारात्मक शक्ती व्यक्तीकडे आकृष्ट होते. जीन्स पँट ही उच्छृंखलतादर्शक असते. तिच्यामुळे व्यक्तीचा अहंकार वाढतो आणि तिला होणार्‍या वाईट शक्तींच्या त्रासाची तीव्रताही वाढते. जीन्स पँटसारख्या असात्त्विक पोशाखामध्ये ईश्‍वरी चैतन्य ग्रहण करण्याची क्षमता अगदी नगण्य असते. त्यामुळे जीन्स पँट, ‘फेडेड जीन्स पँट (पँटच्या काही भागातील रंग फिकट असल्याने ‘पांढर्‍या रंगाचा पट्टा आहे’, असे वाटणारी) अथवा अन्य अशा नवीन ‘फॅशन’ची जीन्स पँट घालू नये.’

१. तमोगुणी पोशाखामुळे वातावरणातील नकारात्मक शक्ती व्यक्तीकडे आकृष्ट होणे

असे चित्रविचित्र कपडे वापरल्याने व्यक्तीतील रज-तम गुण मोठ्या प्रमाणावर वाढतो. विविध प्रकारच्या ‘फॅशन’च्या नावाखाली फाटक्या, ठिगळे लावल्यासारख्या, तंग अथवा अधिक लांबीच्या जीन्स पँटमुळे तामसिकता वाढून व्यक्तीला होणार्‍या आध्यात्मिक त्रासात वाढ होते. त्यामुळे ‘पोशाख आरामदायी आहे’, असा वरवरचा विचार न करता त्या पोशाखामुळे सूक्ष्म स्तरावर होणार्‍या परिणामांचा विचार करावा. अशा प्रकारचेे कपडे परिधान करण्याऐवजी व्यक्तीसाठी सात्त्विक कपडे परिधान करणे अधिक लाभदायी असते.

२. हिंदु संस्कृतीनुसार सदरा आणि धोतर ही पुरुषांसाठी सात्त्विक वेशभूषा !

जीन्स पँटऐवजी अंगरखा आणि पायजमा वापरणे, हे त्या तुलनेत अधिक सात्त्विक आहेे. हा पोशाख रज-सत्त्वप्रधान असून तो संयम अन् धैर्य यांचे दर्शक आहे. या वेशभूषेमुळे अहं न्यून होऊन वाईट शक्तींचा त्रासही उणावू शकतो आणि ईश्‍वरी चैतन्य अधिक प्रमाणात ग्रहण करता येते. हिंदु संस्कृतीनुसार अंगरखा आणि धोतर ही पुरुषांसाठी सात्त्विक वेशभूषा आहे. ती निर्मळतादर्शक असून तिच्यामुळे अहं अल्प होतो, तसेच वाईट शक्तींचा त्रासही अत्यल्प होतो. यामुळे लहान मुले आणि पुरुष यांनी असात्त्विक वेशभूषेचा त्याग करून प्राधान्याने अंगरखा आणि धोतर परिधान करावे. ते शक्य नसल्यास किमान अंगरखा आणि पायजमा वापरावा.’

– (परात्पर गुरु) डॉ. आठवले

 

तरुणींनो, आधुनिकतेच्या आणि नाविन्याच्या
अट्टाहासापायी असात्त्विक अन् अशोभनीय पोशाख परिधान करू नका !

‘सध्या तरुणी आणि मध्यमवयीन स्त्रिया यांच्यामध्ये तोकडा अन् अंगाला घट्ट बसणारा ‘जीन्स पँट आणि टी-शर्ट’ हा पोशाख घालणे मोठ्या प्रमाणावर वाढले आहे. या असात्त्विक पोशाखामुळे स्त्रियांच्या मानसिक, तसेच आध्यात्मिक त्रासांत वाढ झाल्याचे लक्षात येते. खरेतर ‘सात्त्विक, सोज्वळ पोशाख आणि विनयशील वर्तन’ हेच स्त्रीचे खरे सौंदर्य आहे; पण आधुनिकतेच्या अन् नाविन्याच्या अट्टाहासापायी अशोभनीय पोशाख घालण्याची स्त्रीवर्गात जणू चढाओढच लागली आहे. लहान मुलींसाठी परकर-पोलके, तर स्त्रियांसाठी नऊवारी आणि सहावारी साडी हे सात्त्विक पोशाख असून स्त्रियांनी सात्त्विक पोशाख आहेत.’

– सौ. सुजाता कुलकर्णी, सनातन आश्रम, रामनाथी, गोवा. (२४.२.२०१९)

 

१. ‘जीन्स’च्या सततच्या वापरामुळे उद्भवणारे विकार !

‘कोणत्याही वस्तूचे यशस्वी मार्केटिंग कसे करायचे’, हे ठाऊक असणार्‍या अमेरिकेने गरिबांची असलेली ही जाडीभरडी जीन्स हळूहळू समाजातील सर्व थरांपर्यंत नेली. जीन्सवर कितीही घाण लागली, तरी जीन्सच्या गडद रंगामुळे ती दिसत नाही. घाणीचे डाग दिसत नाहीत, याचा अर्थ ‘घाण नाही’, असा होत नाही. लोकांचे समजसुद्धा विचित्रच असतात. ‘जीन्स जेवढी मळलेली तेवढी चांगली’, असे समजतात. केवळ डाग दिसत नाहीत; म्हणून एकच जीन्स चार चार दिवस वापरतात. अशा प्रकारे अस्वच्छ असलेले कपडे अंगावर घालणे, हे आजारांना आमंत्रण देणारे आहे. जीन्सचे कापड पुष्कळ जाड असते, त्यामुळे हवासुद्धा सहजपणे जाऊ शकत नाही. त्यामुळे उष्णता कपड्यांच्या आतच कोंडून ठेवली जाते. थंड वातावरणात रहाणार्‍या व्यक्तींनी जीन्स वापरली, तर ठीक आहे; पण भारतासारख्या उष्ण कटिबंधातील लोकांनी सतत जीन्स वापरणे पूर्णपणे चूक आहे.

१ अ. त्वचाविकार

कंबर, जननेंद्रिय आणि जांघेच्या भागात एरव्हीही अधिक प्रमाणात घाम येतो. नेहमी जीन्स वापरल्याने हा घाम त्या ठिकाणी साचून रहातो आणि ‘फंगल इन्फेक्शन’ होते. जर एकच जीन्स न धुता चार चार दिवस वापरली, तर जीन्सवरची घाण आणि आतला साचणारा घाम याच्यामुळे अशा व्यक्तींना होणारे ‘फंगल इन्फेक्शन’ कितीही औषधोपचार केले, तरी बरे होत नाहीत. गेल्या पाच वर्षांत असे जुनाट ‘फंगल इन्फेक्शन’चे रुग्ण मोठ्या प्रमाणात वाढले आहेत. जीन्सचा अतिरेकी वापर हे याचे महत्त्वाचे कारण आहे.

१ आ. मूळव्याध आणि ‘फिशर’

अलीकडे बहुतांश लोकांच्या कामाचे स्वरूप बैठे आहे. संगणकीय क्षेत्रात काम करणारे लोक १२ घंटे बसून असतात. अनेकदा तर नैसर्गिक विधींसाठीही उठायची अनुमती नसते. जीन्स घालून सतत रेग्झिनच्या खुर्चीवर बसल्याने मोठ्या प्रमाणात उष्णता निर्माण होते. ही उष्णता काही जणांमध्ये मूळव्याध (पाईल्स), ‘फिशर’ यांसारखे गुदद्वाराशी संबंधित आजार निर्माण करते. ‘पाईल्स’ म्हणजे गुदद्वाराशी निर्माण होणारे अंकुर, तर शौचाच्या ठिकाणी निर्माण होणार्‍या जखमेला ‘फिशर’ असे म्हणतात. ही जखम अत्यंत वेदनादायक असते. कधी कधी बद्धकोष्ठतेचा विशेष त्रास नसणार्‍या व्यक्तींमध्येही ‘फिशर’चा त्रास बघायला मिळतो. अशा वेळी त्याचे कारण ‘जीन्स घालून सतत एका जागी बसणे’, हे असते.

१ इ. पुरुषांमध्ये शुक्राणूनिर्मितीस बाधा

अलीकडे ‘लो वेस्ट’, ‘पेन्सिल फीट’ जीन्सची फॅशन आहे. हा प्रकार तर अजून तापदायक आहे. ‘जंक फूड’ खाऊन वाढलेले पोट लपवण्यासाठी अनेक जण या जीन्समध्ये शिरण्याचा केविलवाणा प्रयत्न करतांना दिसतात. अशा प्रकारचे अत्यंत घट्ट कपडे घातल्याने वृषणावर (Testicls) दाब पडून त्यांना इजा होण्याचा संभव असतो. शुक्राणू सिद्ध होण्यासाठी शरिराच्या तापमानापेक्षा साधारण ४ अंश सेल्सिअस कमी तापमान आवश्यक असते; म्हणूनच वृषण हा अवयव शरिराच्या बाहेरील बाजूस असतो. सतत जीन्स घातल्यामुळे या भागातील तापमान वाढते. त्यामुळे शुक्राणू निर्मितीच्या प्रक्रियेस बाधा पोेचू शकते. ‘टाईट जीन्स’ हे हल्ली पुरुषांमधील वाढत्या वंध्यत्वामागचे महत्त्वाचे कारण आहे.

१ ई. आम्लपित्त

वाढलेल्या उष्णतेवर मात करण्याचा उपाय म्हणून बरेच जण अधिकाधिक पाणी पिणे चालू करतात. त्याचाही फायद्याऐवजी तोटाच होतो. वाढलेल्या पोटावर जीन्स ताणून बसवलेली असतांना अतिरिक्त पाणी प्यायल्याने पोटावर दाब पडून खाल्लेले अन्न वर वर येऊन आम्लपित्ताचा त्रास चालू होतो.

१ उ. कंबर आणि मांड्यांच्या नसांना (Nerves) ईजा

नेहमी घट्ट जीन्स घालणार्‍या आणि उंच टाचेच्या चप्पल (हील्स) घालणार्‍या तरुणींची व्यथा काय सांगावी ? उभे रहाणे आणि चालणे या क्रिया विचित्र पद्धतीने कराव्या लागल्यामुळे त्यांना कंबरदुखी, टाचदुखी आणि पोटर्‍यांमध्ये गोळे येणे, अशा त्रासांंना तोंड द्यावे लागते. घट्ट जीन्समुळे कंबर आणि मांड्यांच्या नसांना (Nerves) ईजा होऊन मांड्यांना  अन् पायांना मुंग्या येणे, आग होणे, यांसारखे प्रकार उद्भवू शकतात.

 

२. हवामानाला आणि आरोग्याला साजेसे कपडे वापरणे योग्य

‘जसा देश तसा वेश’ अशी म्हण आहे. आज आपला पेहराव ‘फॅशन’वर ठरतो. कधीतरी बदल म्हणून करण्याची ‘फॅशन’ हीच आवड झाली, तर आरोग्याची परिस्थिती कशी भीषण होते, याचे उदाहरण म्हणजे जीन्स. जीन्सला पर्याय ठरू शकेल, असा जाड्याभरड्या खादीचा पर्याय आपल्याकडे होता. याचा अर्थ ‘सगळ्यांनी धोतर आणि सदरा घालावा’, असे आजिबात नाही; पण सुती आणि आरामदायी विजारी घातल्याने आपण लगेच गावंढळ होत नाही. जे कपडे आपल्या हवामानाला आणि आरोग्याला साजेसे आहेत, तेच वापरणे शहाणपणाचे नाही का ?’

– डॉ. पुष्कर पुरुषोत्तम वाघ, आयुष आयुर्वेद क्लिनिक, डोंबिवली.