पिंपरी-चिंचवड येथील ‘आय.डी.टी.आर्.’ संस्थेत वाहनचालकांसाठी सनातन संस्थेच्या वतीने ‘तणावमुक्त मन:स्थिती’ विषयावर मार्गदर्शन !

पिंपरी-चिंचवड : राष्ट्रीय रस्ता सुरक्षा महिना १ जानेवारी २०२६ ते ३१ जानेवारी २०२६ या कालावधीत साजरा करण्यात येत असून त्या अनुषंगाने ‘आय.डी.टी.आर्.’ (ड्रायव्हिंग प्रशिक्षण आणि संशोधन संस्था) येथे रस्ता सुरक्षा महिन्याचा औपचारिक उद्घाटन समारंभ उत्साहपूर्ण वातावरणात पार पडला. राष्ट्रीय रस्ता सुरक्षा महिन्यानिमित्त ‘आय.डी.टी.आर्.’द्वारे जानेवारी महिन्यात विविध जनजागृती उपक्रम, प्रशिक्षण कार्यक्रम, तसेच रस्ता सुरक्षा विषयक कृतीशील उपक्रम राबवण्यात येणार आहेत. या अंतर्गत येथील प्रसिद्ध ‘इन्स्टिट्यूट ऑफ ड्रायव्हिंग ट्रेनिंग अँड रिसर्च’ संस्थेत सनातन संस्थेच्या वतीने ‘तणावमुक्त मन:स्थितीचे महत्त्व आणि उपाय’ या विषयावर मार्गदर्शन करण्यात आले. या कार्यशाळेत सनातनच्या साधिका प्राचार्य श्रीमती हेमलता खेडकर यांनी मार्गदर्शन केले. या प्रसंगी रुग्णवाहिका चालक, महिला कॅबचालक आणि इतर प्रशिक्षणार्थी असे पुष्कळ जण उपस्थित होते.

या वेळी मार्गदर्शन करतांना श्रीमती खेडकर म्हणाल्या की, रुग्णवाहिकेसारखी महत्त्वाची वाहने चालवतांना चालकाचे मन शांत आणि सकारात्मक असणे आवश्यक आहे. मनावर येणार्‍या ताणामागील शारीरिक आणि मानसिक कारणे समजून घेऊन त्यावर नामजप, प्राणायाम अन् स्वयंसूचना या त्रिसूत्रीचा अवलंब केल्यास मन चिंताविरहित अन् प्रसन्न रहाते. हे प्रयत्न आपल्या व्यक्तीमत्त्व विकासासाठीही अत्यंत पूरक आहेत.

कार्यशाळेत नेहमीच्या विषयांसोबतच ‘मानसिक ताण निर्मूलना’चा विषय समाविष्ट केल्याविषयी प्रशिक्षणार्थींनी समाधान व्यक्त केले. या उपक्रमासाठी ‘आय.डी.टी.आर्.’चे व्यवस्थापकीय संचालक श्री. संजय ससाणे आणि प्रशिक्षक श्री. दिनेश मंडोरे यांचे मोलाचे सहकार्य लाभले.

वैशिष्ट्यपूर्ण सूत्रे