‘वर्ष २०१९ च्या शेवटी आलेल्या कोरोना महामारीच्या कालावधीत जगभरात दळणवळण बंदी लागू झाली. अनेक ठिकाणी कौटुंबिक समस्यांमध्ये वाढ होऊन जीवन तणावपूर्ण झाले होते. ‘सर्वांना नवसंजीवनी मिळावी’, यासाठी सनातन संस्थेद्वारे ‘ऑनलाईन’ साधना सत्संगा’चे आयोजन करण्यात आले होते.
 सनातनच्या धर्मप्रचारक सद्गुरु स्वाती खाडये ‘साधना सत्संगा’ तील जिज्ञासूंना जोडून ठेवण्यासाठी कसे प्रयत्न करायला हवेत ?’, याविषयी सत्संगसेवकांना सतत मार्गदर्शन करून साधना सत्संगाच्या सत्संगसेवकांना घडवतात. या मार्गदर्शनाचा लाभ घेऊन सत्संगसेवकांनी प्रयत्न केल्याने सत्संगसेवक आणि सत्संगातील जिज्ञासूही प.पू. गुरुदेवांच्या (सच्चिदानंद परब्रह्म डॉ. आठवले यांच्याप्रती) प्रती उत्कट भाव अनुभवत आहेत. परात्पर गुरुदेवांचा संकल्प, सद्गुरु आणि संत यांचे आशीर्वाद यांमुळे साधना सत्संगाला उपस्थित रहाणार्‍या अनेक जिज्ञासूंनी त्यांच्या जीवनात आमूलाग्र पालट घडल्याचे अनुभवले. पश्चिम महाराष्ट्र आणि गोवा येथे चालू असलेल्या साधना सत्संगांच्या माध्यमातून जिज्ञासूंनी केलेले वैशिष्ट्यपूर्ण प्रयत्न, अनुभवलेले पालट आणि त्यांना आलेल्या अनुभूती पुढे दिल्या आहेत. ‘ऑनलाईन सत्संगा’द्वारे विविध जिल्ह्यांतील जिज्ञासू जोडले जात असल्याने या लेखात मुंबई आणि जळगाव या जिल्ह्यांतील जिज्ञासूंच्याही अनुभूती समाविष्ट करण्यात आल्या आहेत. – सौ. मनीषा महेश पाठक (आध्यात्मिक पातळी ६९ टक्के), पुणे. (२९.८.२०२२) |
१. पुणे
१ अ. सौ. पूजा जाधव, पुणे
१ अ १. स्वभावदोष-निर्मूलनाचे प्रयत्न केल्याने मनावरील ताण न्यून होणे : ‘मी साधना सत्संगात सहभागी होऊ लागल्यापासून माझ्याकडून स्वभावदोष आणि अहं यांच्या निर्मूलनाची प्रक्रिया राबवण्यासाठी चांगले प्रयत्न झाले. त्यामुळे विविध कारणांमुळे माझ्या मनावर येणारा ताण न्यून झाला.
१ अ २. आईचे निधन झाल्यावरही साधिका स्थिर असणे आणि आईने निधनापूर्वी साधिकेला ‘सनातनच्या मार्गदर्शनानुसार साधना करत असल्याने मला तुझी काळजी वाटत नाही’, असे सांगणे : १५.१.२०२२ या दिवशी माझ्या आईचे निधन झाले; मात्र त्याही परिस्थितीत मी स्थिर हाते. आईचे निधन झाल्यानंतरही मी साधना चालू ठेवली. माझ्या आईच्या निधनानंतर सौ. मनीषा महेश पाठक (आध्यात्मिक पातळी ६९ टक्के) यांनी मला दूरभाष केल्यावर मी त्यांना माझ्या आईने सांगितलेले वाक्य सांगितले. आई मला म्हणाली होती, ‘‘आता तू सनातनच्या मार्गदर्शनानुसार साधना करत आहेस आणि सत्संगामुळे तुझ्यात पुष्कळ पालट झाला आहे. पूजा, मला आता तुझी काळजी वाटत नाही.’’
१ आ. सौ. कीर्ती महाजन, कोथरूड, पुणे.
१ आ १. बहीण रुग्णाईत झाल्यावर ‘साधनेचे प्रयत्न कसे करू ?’, असे सत्संगसेवकांना विचारणे : ‘मी आणि सौ. सोनाली अंबुलकर, आम्ही दोघी सख्ख्या बहिणी असून साधना सत्संगात सहभागी होत असतो. आम्ही दोघीही नियमितपणे व्यष्टी आणि समष्टी साधनेसाठी प्रयत्न करतो. काही दिवसांपूर्वी सौ. सोनालीताई रुग्णाईत झाली. घरातील कामे आणि बहिणीची सेवा यांमुळे धावपळ होऊन मला सारणी लिखाणासाठी पुरेसा वेळ मिळत नव्हता. मी सत्संगसेवकांना भ्रमणभाष करून ‘साधनेचे प्रयत्न कसे करू ?’, असे विचारले.
१ आ २. ‘बहीण ही एक साधिका आहे’, असा भाव ठेवल्याने तिची सेवा मनापासून करता येणे : सत्संगसेवकांनी सांगितल्याप्रमाणे मी भाव ठेवून सोनालीताईची सर्व सेवा केली. सोनालीताई माझी बहीण असली, तरी ‘ती एक साधिका आहे’, असा भाव मी ठेवला. मी अन्नपूर्णादेवीला प्रार्थना करून तिच्यासाठी स्वयंपाक करत असल्याने मला ताईला द्यावयाच्या जेवणातील पदार्थांत नाविन्य ठेवता आले. रुग्णाईत असतांना रुग्णाला जेवण्याची इच्छा होत नाही; मात्र सोनालीताई डबा येण्याची वाट पहायची. या कालावधीत मला ‘इतरांना समजून घेऊन कसे वागायचे ?’, हे शिकायला मिळाले.
१ आ ३. रुग्णालयातही साधनेचे केलेले प्रयत्न : मी रुग्णालयात सोनालीताईला कापूर, दैनिक ‘सनातन प्रभात’ आणि विभूती दिली. ताईनेही भाव ठेवून आध्यात्मिक स्तरावरील सर्व उपाय केले. आम्ही दोघींनीही या कठीण प्रसंगात ‘खोलीत नामजप लावणे, गुरुस्मरण करणे, नामजपादी उपाय करणे’, असे प्रयत्न केले.’
१ इ. सौ. सोनाली अंबुलकर, सिंहगड रस्ता, पुणे.
१ इ १. ‘परात्पर गुरु डॉ. आठवले यांच्या कृपेने शस्त्रकर्म टळले’, असे जाणवणे : ‘या आधी माझे ४ वेळा शस्त्रकर्म झाले आहे. या वेळी ‘आता पुन्हा शस्त्रकर्म होईल का ?’, असे मला वाटत होते; मात्र ‘केवळ गुरुकृपेने (परात्पर गुरु डॉ. आठवले यांच्या कृपेने) शस्त्रकर्म टळले’, असे मला वाटले. त्यामुळे मला मनातून प.पू. गुरुदेवांप्रती पुष्कळ कृतज्ञता वाटली.
१ इ २. ‘गुरुदेवांच्या कृपेने रुग्णालयातील परिचारिकांनी मला पुष्कळ प्रेमाने साहाय्य केले. त्यांच्या माध्यमातून प.पू. गुरुदेवांनीच माझ्यावर कृपा केली’, असा माझा भाव आहे.’
१ ई. सौ. सुवर्णा देवकर, रविवार पेठ, पुणे.
१ ई १. स्वयंसूचना देऊन नामजप केल्यावर मनातील नकारात्मक विचार न्यून होणे : ‘माझ्या घरी पुष्कळ अडचणी होत्या. त्यामुळे माझ्या मनात पुष्कळ नकारात्मक विचार येत होते. शेवटी मी सत्संगसेवकांना भेटायला त्यांच्या घरी गेले आणि त्यांच्याकडून नामजप कोणता करायचा आणि नकारात्मक विचारांवर स्वयंसूचना कोणती द्यायची, हे समजून घेतले. स्वयंसूचना देऊन नामजप केल्यावर माझ्या मनातील नकारात्मक विचार न्यून झाले.
१ ई २. यजमान रुग्णाईत असतांना प्रार्थना आणि नामजप केल्यामुळे स्थिर रहाता येणे : माझे यजमान पुष्कळ रुग्णाईत होते. तेव्हा मी नामजप आणि प्रार्थना करून त्या प्रसंगात स्थिर रहाण्यासाठी प्रयत्न केला.
१ ई ३.साधना सत्संगातून मिळणारे चैतन्य, ज्ञान आणि सात्त्विकता यांमुळे मला कठीण प्रसंगांना सामोरे जाता आले’, असे मला वाटते.’
१ उ. सौ. अमिता केंकरे, गावठाण, पुणे.
१ उ १. साधना सत्संगात सांगितलेल्या साधनेच्या दृष्टीकोनांमुळे स्वभावदोषांवर मात करता येऊन मनावरचा ताण न्यून होणे : ‘मी नियमितपणे साधना सत्संगात सहभागी होते. माझ्या घरी अनेक अडचणी असल्यामुळे घरात सतत तणावाचे वातावरण असते. मला साधना सत्संगामध्ये ‘प्रारब्ध म्हणजे काय ? नामजपाने प्रारब्ध कसे सुसह्य होते ? परिस्थिती स्वीकारून स्थिर कसे रहायचे ?’, हे शिकायला मिळाले. सत्संगात सांगितलेल्या साधनेच्या दृष्टीकोनांमुळे मला ‘भीती वाटणे किंवा परिस्थितीला सामोरे जाता न येणे’, या स्वभावदोषांवर मात करता आली आणि मनावर येणार्‍या ताणामुळे होणारा त्रास न्यून झाला.
१ उ २. प्रयत्नपूर्वक मनातल्या मनात नामजप केल्यावर अधिक स्थिरता अनुभवता येणे : माझा पोळ्या वितरण करण्याचा व्यवसाय आहे. पोळ्यांच्या व्यवसायातील व्यस्ततेमुळे माझा नामजप होत नव्हता. मी सत्संगसेवकांशी बोलून प्रयत्नपूर्वक मनातल्या मनात नामजप करायला आरंभ केला. त्यामुळे आता मला पूर्वीपेक्षा अधिक स्थिरता अनुभवता येत आहे.
१ उ ३. आता माझे यजमान आणि मुले यांनीही सत्संग ऐकण्यास आरंभ केला आहे.’
१ ऊ. सौ. संध्या उचाळे, बारामती, जिल्हा पुणे.
१ ऊ १. ‘श्री गुरुदेव दत्त ।’, हा नामजप केल्याने मुलगा आणि बहीण यांचा त्रास न्यून होऊन त्यांना चांगली झोप लागणे : ‘साधना सत्संगात सहभागी होण्यास आरंभ केल्यानंतर मी ‘माझ्या नातेवाइकांना साधना सांगणे, अर्पण गोळा करणे, नामसत्संग घेणे’, अशा सेवा अधिक वेळ करू लागले. साधनेला आरंभ केल्यामुळे माझ्या कुटुंबियांमध्ये अनेक पालट झाले. पूर्वी माझा मुलगा कु. सिद्धांत (वय १३ वर्षे) रात्री झोपेत घाबरून उठत असे. ‘त्याला हा त्रास पूर्वजांमुळे होत आहे’, हे लक्षात आल्यावर मी मुलाकडून ‘श्री गुरुदेव दत्त ।’, हा नामजप करून घेण्यास आरंभ केला. आता मुलगाही प्रतिदिन नामसत्संगात सहभागी होऊ लागल्यामुळे त्याला होणारा त्रास दूर झाला. माझ्या बहिणीला निद्रानाशाचा त्रास होता. तिने ‘श्री गुरुदेव दत्त ।’, हा नामजप चालू केल्यावर तिला आता शांत झोप लागत आहे.
१ ऊ २. देवावरील श्रद्धा वाढल्याने सकारात्मकता आणि आनंद यांत वाढ होणे : साधना सत्संगात सहभागी होण्यापूर्वी मला छोट्या छोट्या गोष्टींचाही ताण येत असे; मात्र आता ‘देव समवेत असल्यामुळे सर्व चांगलेच होणार’, ही श्रद्धा वाढली आहे. आता माझ्या मनावर कोणत्याही गोष्टीचा ताण नाही. माझ्यातील सकारात्मकता आणि आनंद यांत वाढ झाली आहे.’
२. मुंबई
२ अ. सौ. हेमा शेवाळे, विरार, मुंबई.
२ अ १. नामजपादी उपाय आणि सेवा करण्याचा प्रयत्न केल्यावर ग्लानी येण्याचे अन् चिडचिड होण्याचे प्रमाण उणावणे आणि त्यामुळे समष्टी सेवा करण्याची तळमळ वाढणे : ‘मला सतत ग्लानी येत असे. साधना सत्संगामध्ये साधनेचे महत्त्व कळल्यावर मी नामजपादी उपाय आणि अधिकाधिक वेळ सेवा करत आहे. सेवेला आरंभ केल्यानंतर मला ग्लानी येण्याचे आणि माझे चिडचिड होण्याचे प्रमाण न्यून झाले आहे. त्यामुळे माझी समष्टी सेवा करण्याची तळमळ पुष्कळ वाढली. दत्तजयंतीच्या निमित्ताने मी विरारमध्ये ग्रंथप्रदर्शन लावण्यासाठी पुढाकार घेऊन ‘प्रदर्शनासाठी अनुमती घेणे, प्रदर्शन लावणे’ इत्यादी सेवा केल्या. आता मी प्रतिदिन घरातील सर्व कामे करून सेवा करते.’
३. सोलापूर
३ अ. अधिवक्त्या (सौ.) स्वाती मारडकर
३ अ १. साधना सत्संगामुळे स्वतःमध्ये सकारात्मक पालट झाले असल्याचे जाणवणे : ‘पूर्वजन्मीची पुण्याई असल्याने मला सनातन संस्थेचा सत्संग लाभत आहे. सनातनच्या सत्संगामुळे माझ्यामध्ये सकारात्मक पालट झाले आहेत. ‘श्री गुरु आपल्यामध्ये इतका पालट करू शकतात’, हे मला सनातनच्या सत्संगात आल्यावर कळले.
३ अ २. जेव्हा मला थकवा जाणवतो, तेव्हा मी स्वतःची मानस दृष्ट काढते. त्यानंतर मला पुष्कळ प्रसन्न वाटते.
३ अ ३. सनातनच्या सत्संगसेवकांचा आधार वाटणे : मला सनातन संस्था आणि तिचे सत्संगसेवक यांचा नेहमी आधार वाटतो. ‘आपले कुणीतरी आहे आणि आपल्याला साधना सांगून ते ती करून घेत आहेत’, यांसाठी मला कृतज्ञता वाटते.’
३ आ. सौ. मीना राजमाने, सोलापूर
३ आ १. सत्संगसेवकांनी समजावून सांगितल्यावर यजमान साधना करू लागणे आणि त्यामुळे समाधान वाटून ‘अधिकाधिक वेळ सेवा करावी’, असे वाटणे : ‘सत्संगसेवक माझ्या यजमानांना सतत दूरभाष करून साधनेचे महत्त्व सांगून ‘देव कसे साहाय्य करतो ?’, हे सांगत असत. त्यामुळे यजमानांनी साधनेला आरंभ केला. त्यांनी व्यष्टी आणि समष्टी साधनेला आरंभ केल्यापासून मला फार समाधान वाटून आनंद मिळत आहे. गुरुदेवांमुळेच माझ्या अनेक अडचणी सुटल्या आहेत. त्यामुळे मला ‘अधिकाधिक वेळ सनातनचे अध्यात्मप्रसाराचे कार्य करावे’, असे वाटते. सध्या मी ‘जिज्ञासूंना संपर्क करणे आणि सनातनच्या ग्रंथांचे वितरण करणे’, या सेवा नियमित करण्याचा प्रयत्न करते.’
३ इ. श्री. राजेंद्र गुजर (वय ६५ वर्षे), सोलापूर
३ इ १. नामजपाचे महत्त्व कळल्यावर वहीत नामजप लिहिणे आणि सेवेला आरंभ करणे : ‘साधना सत्संगातून नामजपाचे महत्त्व कळल्यावर मी वहीत नामजप लिहिण्यास आरंभ केला. आतापर्यंत मी ७० वह्या भरून नामजप लिहिला आहे आणि सत्संगांतील सर्व विषय वहीमध्ये लिहून घेतले आहेत. मी सनातनचे ग्रंथ मोठ्या संख्येने खरेदी करून त्यांचे वितरणही केले आहे.
३ इ २. धनाच्या त्यागाचे महत्त्व समजल्यानंतर स्वतःची वाहने अध्यात्मप्रसाराच्या कार्यासाठी अर्पण करणे : साधना सत्संगात धनाच्या त्यागाचे महत्त्व समजल्यानंतर मी माझे चारचाकी वाहन अर्पण करण्याचा निर्णय घेतला आणि माझी नवीन गाडी आल्यावर मी ती घरी न नेता अर्पण केली.’
३ ई. सौ. सुनीता कदम, अकलूज, जिल्हा सोलापूर.
१. ‘मी साधना सत्संगात सांगितल्याप्रमाणे तत्परतेने कृती करण्याचा प्रयत्न करते. आता मी नियमितपणे दिवसभर ‘श्री गुरुदेव दत्त ।’ हा नामजप करते.’
२. ‘केसांचा अंबाडा घालणे’, ही सात्त्विक केशरचना आहे’, असे सत्संगात सांगितले होते. त्यानंतर मी सलग ८ दिवस अंबाडा घातला. तेव्हा माझ्या लक्षात आले, ‘अंबाडा घातल्याने केस न तुटता व्यवस्थित रहातात.’
४. जळगाव
४ अ. सौ. कल्पना भंगाळे, जळगाव
४ अ १. सद्गुरु स्वाती खाडये यांच्या ‘ऑनलाईन’ सत्संगामध्ये सहभागी झाल्यापासून साधनेचे गांभीर्य आणि सेवेची तळमळ वाढणे : ‘मी मागील दीड वर्षापासून नियमितपणे साधना सत्संगात सहभागी होते आणि सत्संगात सांगितल्याप्रमाणे ‘नामजपादी उपाय करणे अन् स्वभावदोष आणि अहं यांच्या निर्मूलनाची प्रक्रिया राबवणे’, असे प्रयत्न नियमितपणे करते. मी सद्गुरु स्वातीताई (सद्गुरु स्वाती खाडये) यांच्या ‘ऑनलाईन’ सत्संगामध्ये सहभागी झाले होते. तेव्हापासून माझे साधनेचे गांभीर्य आणि सेवेची तळमळ वाढली आहे. ‘घरातील प्रसंगांवरही मी साधनेच्या दृष्टीकोनातून कसा विचार करायचा ?’, ते सत्संगात समजून घेतले.
४ अ २. भावाचे निधन झाल्यावर वहिनीला आधार देणे आणि घरात नामजप लावून ठेवणे : माझ्या भावाचे अकस्मात् निधन झाले. तेव्हा मी माझ्या वहिनीला आधार दिला. घरात नामजप लावून ठेवला. तेथे आलेल्या नातेवाइकांना मी साधना सांगितली. आता माझ्या २ बहिणी आणि वहिनी यांनी नामजप सत्संगात सहभागी व्हायला आरंभ केला आहे.
४ अ ३. मी सामाजिक माध्यमांतून ‘अध्यात्मप्रसार आणि ग्रंथांचे वितरण करणे’, या सेवा नियमितपणे करत आहे.’
५. सांगली
५ अ. सौ. जयश्री हट्टे, कूपवाड, जिल्हा सांगली.
५ अ १. यजमान रुग्णाईत असतांना नामजप केल्याने यजमानांना दोन दिवसांतच बरे वाटू लागणे : ‘साधना सत्संगात सहभागी व्हायला लागल्यापासून मला अनेक अनुभूती आल्या. माझे यजमान श्री. शंकर हट्टे रुग्णाईत असतांना मी सत्संगसेवकांनी सांगितल्याप्रमाणे नामजप केला, तसेच ‘त्यांच्यासाठी नामजप लावून ठेवणे आणि त्यांची मानस दृष्ट काढणे’, असे प्रयत्न केले. त्यामुळे यजमानांना दोन दिवसांतच बरे वाटू लागले. तेव्हा माझा कृतज्ञताभाव जागृत झाला.
६. कोल्हापूर
६ अ. सौ. कांचन महेश पवार, कोल्हापूर
६ अ १. साधिका आणि तिचे यजमान यांनी सत्संग ऐकून साधना चालू करणे : ‘आरंभी केवळ मीच सत्संगात सहभागी होत असे; पण नंतर माझे यजमान डॉ. महेश पवार यांनीही ४ मास नियमितपणे सत्संग ऐकला. विशेष म्हणजे त्यांनीही साधना चालू केली. आता आम्ही दोघेही साधना सत्संगात नियमित सहभागी होतो. आम्ही दोघे ‘नामजप करणे, स्वयंसूचना सत्र (स्वभावदोष न्यून होण्यासाठी दिवसातून ४ – ५ वेळा मनाला दिलेल्या सूचना) करणे’, असे साधनेचे प्रयत्न करत आहोत. आम्ही दोघेही सत्संगामध्ये सांगितलेली सर्व सूत्रे तत्परतेने पूर्ण करतो.
६ अ २. सत्संगात सत्सेवेचे महत्त्व समजल्यापासून साधिका आणि तिचे यजमान करत असलेल्या विविध सेवा : सत्संगामध्ये सत्सेवेचे महत्त्व ऐकल्यापासून मी ५ फलकांवर राष्ट्र आणि धर्म जागृतीपर लिखाण करण्याची सेवा करण्यास प्रारंभ केला. गरोदरपणात ८ वा मास चालू असेपर्यंत मी फलकलेखनाची सेवा केली. डॉ. महेश पवार ‘त्यांच्या रुग्णालयात आलेल्या रुग्णांना साधना आणि नामजप यांचे महत्त्व सांगणे, रुग्णालयात नामजप लावणे, रुग्णालयात वितरणासाठी ग्रंथ आणि सात्त्विक उत्पादने यांचे प्रदर्शन लावणे, मंदिरांमध्ये नामजप लावण्यासाठी प्रयत्न करणे’, यांसाठी प्रयत्न करतात. ते रुग्णांना तपासायला जातांना सनातनचे ग्रंथ आणि सात्त्विक उत्पादने समवेत नेऊन रुग्णांना साधना करायला सांगतात. ‘प्रत्येक प्रसंगातून आमच्याकडून साधना व्हावी’, असा आम्हा दोघांचाही भाव असतो.’
६ आ. सौ. सुगंधा रामचंद्र गायकवाड (वय ६५ वर्षे), कोल्हापूर
६ आ १. स्वभावदोष आणि अहं यांच्या निर्मूलनाची प्रक्रिया समजून घेऊन सारणी लिखाण करणे : ‘मी सत्संगात सांगितलेल्या प्रत्येक सूत्राप्रमाणे कृती करण्याचा प्रयत्न करते. मला वाटत होते, ‘मला स्वभावदोष आणि अहं यांच्या निर्मूलनाची प्रक्रिया राबवायला जमणार नाही’; पण माझा सत्संगसेवकांशी नियमित संपर्क होत असल्याने ‘ही प्रक्रिया सहजतेने कशी करू शकते ?’, हे मला शिकायला मिळाले. मी प्रतिदिन सारणी लिखाण करायलाही आरंभ केला आहे.
६ इ. सौ. आसावरी एरंडे, नागाळा पार्क, कोल्हापूर.
६ इ १. स्वभावदोष न्यून होण्यासाठी स्वयंसूचना दिल्यावर स्वभावदोष न्यून होऊन साधना मनापासून केली जाणे : ‘मी मागील ८ वर्षांपासून सनातनच्या अध्यात्मप्रसाराच्या कार्यात सहभागी होत आहे; मात्र मी साधना सत्संगात सहभागी व्हायला लागल्यापासून व्यष्टी साधना मनापासून करू लागले. पूर्वी ‘माझे काही चुकत नाही’, अशी माझी विचारप्रक्रिया असायची. ‘परिस्थितीला दोष देणे, उतावीळपणा’ इत्यादी स्वभावदोष दूर होण्यासाठी मी स्वयंसूचना सत्रे करून प्रयत्न केले. आता माझ्यातील उतावीळपणा न्यून झाला असून ‘माझे कुठे चुकत आहे ? मी कुठे न्यून पडते ?’, अशी माझी विचारप्रक्रिया होत आहे. साधना सत्संगात सांगितल्यापासून माझे भावजागृतीचे प्रयत्न वाढले आहेत. प्रत्येक कृती भावपूर्ण करण्याचा माझा प्रयत्न असतो.
६ इ २. साधना सत्संगातून प्रेरणा मिळाल्यामुळे मी ‘सनातनचे ग्रंथ आणि सात्त्विक उत्पादने यांचे वितरण करणे, समाजात जाऊन अर्पण अन् नामजप यांचे महत्त्व सांगून प्रवचनांचे आयोजन करणे’, अशा सेवा नियमितपणे करत आहे.’
६ ई. सौ. राजश्री तळप, इचलकरंजी, जिल्हा कोल्हापूर.
६ ई १. पूर्वजांच्या त्रासामुळे घरात व्यसनाधीनता आणि तणावाचे वातावरण असणे : ‘मी मागील ८ वर्षांपासून सनातनच्या कार्यात सहभागी होत आहे. आमच्या कुटुंबातील पूर्वजांना गती न मिळाल्यामुळे संपूर्ण कुटुंबाला विविध आध्यात्मिक त्रास होत असतात. आध्यात्मिक त्रासांच्या तीव्रतेमुळे नरसोबाच्या वाडीला जातांना माझ्या सासर्‍यांचा अपघात झाला होता. आमच्या घरामध्ये व्यसनाधीनता असून तणावाचे वातावरण असते.
६ ई २. सत्संगातून साधनेचे दृष्टीकोन शिकायला मिळणे आणि त्याप्रमाणे प्रयत्न चालू करणे : मी साधना सत्संगात सहभागी व्हायला लागल्यापासून मला साधनेचे विविध दृष्टीकोन शिकायला मिळाले. ‘भावजागृतीतून साधना’ हा विषय कळल्यावर मी भावाच्या स्तरावरील प्रयत्न वाढवले.
६ ई ३. अनुभूती – पितृपक्षात दत्ताचा नामजप करत असतांना ‘प.पू. गुरुदेव पूर्वजांना जेवायला घालत असून सर्व पूर्वज तृप्त झाले आहेत’, असे जाणवणे आणि त्यानंतर घरातील व्यसनाधीनता न्यून होऊन तणावाचे वातावरण निवळणे : वर्ष २०२० मधील पितृपक्षात मी पुरोहितांना शिधा दिला. तेव्हा मी ‘तो शिधा प.पू. गुरुदेवांच्या चरणी अर्पण करत आहे’, असा भाव ठेवला. मी तळमळीने ‘श्री गुरुदेव दत्त ।’, हा नामजप करत असतांना मला ‘प्रत्यक्ष प.पू. गुरुदेव पूर्वजांना जेवायला घालत असून सर्व पूर्वज तृप्त आणि समाधानी झाले आहेत. ते माझ्या मुलावर पुष्पवृष्टी करून त्याला आशीर्वाद देत आहेत’, अशी अनुभूती आली. त्यानंतर माझ्या घरातील व्यसनाधीनता न्यून होऊन तणावाचे वातावरणही निवळले. तेव्हापासून मी नियमित व्यष्टी साधना करत असून सर्व समष्टी सेवांमध्ये तळमळीने सहभाग घेते.’
६ उ. सौ. नम्रता अंदरघिस्के, इचलकरंजी, जिल्हा कोल्हापूर.
६ उ १. सद्गुरु स्वाती खाडये यांनी ‘ऑनलाईन’ भेटीत सांगितल्यानुसार दत्ताचा नामजप चालू केल्यावर नामजप करतांना होणारे त्रास न्यून होणे : ‘मी मागील ६ मासांपासून नामसत्संग ऐकत आहे. आता मी साधना सत्संगात सहभागी होत आहे. आरंभी माझ्या मनातील नकारात्मकतेमुळे बसून नामजप करतांना माझ्या मनाची एकाग्रता होत नसे. सत्संगसेवकांनी मला यावर स्वयंसूचना सत्र करण्यास सांगितले. स्वयंसूचनेमुळे माझ्या मनातील नकारात्मकता न्यून होऊन सेवेचा उत्साह वाढला. नंतर मी सद्गुरु स्वाती खाडये यांच्याशी झालेल्या ‘ऑनलाईन’ भेटीमध्ये त्यांच्याशी बोलले. त्यांनी मला दत्ताचा नामजप करायला सांगितला. त्याप्रमाणे मी दत्ताचा नामजप चालू केल्यावर माझे त्रास हळूहळू न्यून झाले.
६ उ २. सध्या करत असलेली सेवा : माझा ‘ऑनलाईन’ व्यवसाय आहे. सत्संगसेवकांनी त्या व्यवसायाच्या माध्यमातून ‘ग्राहकांना साधना सांगता येऊ शकते’, असे सुचवले. त्याप्रमाणे मी ग्राहकांना ‘साधना सांगणे, त्यांच्यासाठी प्रवचनांचे आयोजन करणे आणि त्यांना सात्त्विक उत्पादनांचे महत्त्व सांगून त्यांचे वितरण करणे’ इत्यादी सेवा करत आहे.’
७. गोवा
७ अ. सौ. दीपा बेतकीकर, ढिगणे, पर्वरी, गोवा.
७ अ १. स्वभावदोष-निर्मूलनासाठी प्रयत्न केल्यावर स्वतःमध्ये सकारात्मक पालट झाल्याने आनंद वाटणे : ‘काही वर्षांपूर्वी मला सेवेची संधी मिळाली होती. त्यानंतर काही कारणाने माझ्या सेवेत खंड पडला. प.पू. गुरुदेवांच्या कृपेने मी ‘ऑनलाईन’ साधना सत्संगात सहभागी होऊ लागल्यामुळे माझी साधना आणि सेवा यांना पुन्हा गती मिळाली. माझ्यातील भीती आणि आळस न्यून होऊन ‘आनंदात कसे रहायचे ?’, हे मला समजले. स्वभावदोष आणि अहं यांच्या निर्मूलनाच्या प्रक्रियेमुळे ‘मनातील इतरांविषयीचे वाईट विचार न्यून होणे, रागावर नियंत्रण ठेवणे आणि अपेक्षा न्यून होणे’, असे पालट माझ्यात होत आहेत. माझे शरीर आणि मन यांना शिस्त लागली. सत्संगातून मिळत असलेले ज्ञान अतिशय मूल्यवान असूनही ते विनामूल्य मिळत आहे. हे सर्व प.पू. गुरुदेवांच्या कृपेने मिळत असल्याबद्दल मी त्यांच्या चरणी कृतज्ञता व्यक्त करते आणि ‘मी प्रयत्न करण्यास न्यून पडते’, यासाठी त्यांच्या चरणी क्षमायाचना करते.’
७ आ. श्रीमती मंदा देसाई, काणकोण, गोवा.
७ आ १. स्वभावदोष-निर्मूलनासाठी प्रयत्न केल्यावर स्वतःमध्ये पुष्कळ पालट होणे आणि त्यामुळे परात्पर गुरु डॉक्टरांप्रती कृतज्ञता वाटणे : ‘साधना सत्संगात सांगितलेली स्वभावदोष आणि अहं यांच्या निर्मूलनाची प्रक्रिया राबवल्यामुळे माझ्यामध्ये पुष्कळ सकारात्मक पालट झाला आहे. माझ्याकडून होणार्‍या चुकांमधून मला माझ्यातील स्वभावदोष लक्षात येत आहेत. त्यामुळे माझा प.पू. गुरुदेवांप्रती कृतज्ञताभाव वाढला आहे.
७ आ २. अनुभूती – घरामध्ये सुगंध आणि प.पू. गुरुदेवांचे अस्तित्व जाणवणे : मागील ६ मासांपासून मी एकाच आसंदीवर बसून नामजपादी उपाय करते आणि सत्संग ऐकते. तिथे कोणतीही उदबत्ती लावलेली नसतांना मला अनेकदा त्या आसंदीतून चंदनाचा सुगंध येतो आणि घरामध्ये प.पू. गुरुदेवांचे अस्तित्व सतत जाणवते.’
(सर्व सूत्रांचा दिनांक : ७.९.२०२२)
| • येथे प्रसिद्ध करण्यात आलेल्या अनुभूती या ‘भाव तेथे देव’ या उक्तीनुसार जिज्ञासू आणि धर्मप्रेमी यांच्या वैयक्तिक अनुभूती आहेत. त्या सरसकट सर्वांनाच येतील असे नाही. – संपादक |
