जाज्ज्वल्य राष्ट्रप्रेम असणारे आणि परात्पर गुरु डॉ. आठवले यांच्याप्रती दृढ श्रद्धा असलेले फोंडा (गोवा) येथील श्री. लक्ष्मण गोरे (वय ८० वर्षे) सनातनच्या ११४ व्या व्यष्टी संतपदी विराजमान !

रामनाथी (गोवा) – राष्ट्र अन् धर्म यांच्याविषयी प्रेम असलेले, परात्पर गुरु डॉ. आठवले यांच्याप्रती दृढ श्रद्धा ठेवून स्वतःत आमूलाग्र पालट करणारे आणि निरागस भावामुळे सर्वांना आपलेसे करणारे फोंडा (गोवा) येथील साधक श्री. लक्ष्मण गोरे (वय ८० वर्षे) सनातनच्या ११४ व्या व्यष्टी संतपदी विराजमान झाल्याची आनंददायी घोषणा सनातनच्या श्रीसत्‌शक्ति (सौ.) बिंदा सिंगबाळ यांनी एका अनौपचारिक सोहळ्याद्वारे केली. या मंगलप्रसंगी पू. गोरेआजोबा यांचा भाव जागृत झाला. सनातनचे सद्गुरु डॉ. मुकुल गाडगीळ यांनी पू. गोरेआजोबा यांना पुष्पहार घालून आणि भेटवस्तू देऊन त्यांचा सन्मान केला.

या मंगल सोहळ्याला सनातनचे संत, तसेच श्री. लक्ष्मण गोरे यांच्या पत्नी सौ. मंगला गोरे (आध्यात्मिक पातळी ६१ टक्के), मुलगी सौ. गौरी आफळे, जावई श्री. वैभव आफळे (आध्यात्मिक पातळी ६४ टक्के) आणि नात कु. योगिनी आफळे यांच्यासह काही साधकही उपस्थित होते.