केवळ महाराष्ट्राचेच नव्हे, तर अखिल भारतवर्षाचे आराध्यदैवत श्री गणेश !
नागपूर शहरात मध्यवर्ती असलेले सिताबर्डी नावाच्या टेकडीवरचे हे मंदिर ! मंदिरात झाडाच्या प्रचंड मोठ्या बुंध्यापाशी असलेली गणेशमूर्ती म्हणजेच टेकडीचा गणपति होय ! हा गणपति नागपूरकरांचे आराध्य दैवत आहे. पूर्वी हे मंदिर हेमाडपंथी होते. या श्री गणेशाची पूजा नागपूर येथील भोसले संस्थानिक करत असत. परकीय आक्रमणात हे मंदिर उद्ध्वस्त झाले. त्यानंतर काही काळाने वर्ष १८६६ मध्ये ही मूर्ती पुन्हा सापडली आणि तेथे मंदिर बांधण्यात आले. माघ मासातील चतुर्थीला येथे मोठा उत्सव असतो. लाखोंच्या संख्येने भक्त या काळात गणपतीच्या दर्शनाला येतात. ही श्री गणेशमूर्ती विदर्भातील अष्ट गणेशांपैकी एक आहे.
सनातनच्या सद्गुरु (सौ.) अंजली गाडगीळ गेल्या ४ वर्षांहून अधिक काळ भारतभर भ्रमण करून प्राचीन मंदिरे, वास्तू, गड आणि संग्राह्य वस्तू यांच्या छायाचित्रांचा संग्रह करत आहेत. त्यामुळेच आपल्याला या प्राचीन मंदिरे, वास्तू यांचे घरबसल्या दर्शन मिळते. त्यासाठी परात्पर गुरु डॉ. आठवले आणि सद्गुरु (सौ.) अंजली गाडगीळ यांच्या चरणी कृतज्ञता व्यक्त करूया !
संदर्भ : दैनिक सनातन प्रभात
