रामनाथी (गोवा) येथील सनातन आश्रमाच्या चैतन्यमय वातावरणात झाला पंचमहाभूत याग

रामनाथी (गोवा) – ‘परात्पर गुरु डॉ. जयंत आठवले यांना दीर्घायुष्य लाभावे, पंचमहाभूतांच्या प्रकोपांपासून साधकांचे रक्षण व्हावे आणि हिंदु राष्ट्राच्या स्थापनेतील सूक्ष्मातील अडथळे दूर व्हावेत’, यांसाठी पुणे येथील संत प.पू. आबा उपाध्ये यांच्या आज्ञेने १८ ऑक्टोबर २०१९ या दिवशी येथील सनातन संस्थेच्या आश्रमात ‘पंचमहाभूत याग’ करण्यात आला. या यागाचे पौरोहित्य सनातन पुरोहित पाठशाळेचे संचालक श्री. दामोदर वझेगुरुजी आणि पाठशाळेतील पुरोहित यांनी केले. प्रारंभी सनातन संस्थेच्या सद्गुरु (सौ.) बिंदा सिंगबाळ यांनी यागासाठी संकल्प केला. ५ कलशांवरील पृथ्वी, आप, तेज, वायू आणि आकाश यांच्या चांदीच्या प्रतिमांवर पंचमहाभूतांचे आवाहन अन् पूजन करण्यात आले. त्यानंतर पंचमहाभूतांसाठी हवन करण्यात आले. पूर्णाहुतीने यागाची सांगता झाली. या यागाला सनातन संस्थेचे संत, तसेच आश्रमातील साधक उपस्थित होते. प.पू. आबा उपाध्ये यांनी असे ३ याग करण्याची आज्ञा केली होती. त्यानुसार १८ ऑक्टोबर या दिवशी या शृंखलेतील शेवटचा याग करण्यात आला.

संदर्भ : दैनिक सनातन प्रभात