रामनाथी, गोवा येथील सनातन आश्रमाच्या भेटीच्या वेळी मान्यवरांना आलेल्या अनुभूती

१. आश्रमात चाललेल्या यज्ञाच्या वेळी सुगंध येणे आणि यज्ञामुळे मन शांत झाल्याने आश्रमातील सात्त्विकता ग्रहण करता येणे

‘रामनाथी आश्रमात एक यज्ञ चालू असतांना मला सुगंधाची अनुभूती आली. यज्ञापूर्वी माझे मन थोडे विचलित झाले होते; पण यज्ञानंतर ते शांत झाले. त्यामुळे मला आश्रमातील सात्त्विकता ग्रहण करता आली. – श्री. श्रवण अग्रवाल, कतरास गढ, जिल्हा धनबाद, झारखंड

२. हिंदु जनजागृती समितीच्या वतीने आयोजित करण्यात आलेल्या रामनाथी आश्रमातील साधकत्ववृद्धी शिबिराच्या वेळी आलेली अनुभूती

‘अकस्मात् रामनाथी आश्रमात प्रकाश आणि झगमगणारे आकाश दिसू लागले. हे पाहून डोळ्यांमध्ये तो प्रकाशच भरून राहिला.’ – मोनिका सिंह, आग्रा (३०.६.२०१६)

३. श्रीकृष्णाच्या चित्राकडे पाहून नामजप (उपाय) करतांना चित्र सजीव होऊन खोली चैतन्याने भरून गेल्याचे जाणवणे

‘२६.१.२०१५ या दिवशी मी माझ्या भावासमवेत श्रीकृष्णाच्या चित्राकडे पाहून नामजप (उपाय) करत होते. त्या वेळी मला चित्रातील श्रीकृष्ण सजीव झाल्याप्र्रमाणे दिसू लागला. श्रीकृष्ण अतिशय सुंदर दिसत होता. मी त्याच्याकडे पाहिल्यावर त्यानेही माझ्याकडे पाहिले. नंतर मला खोली चैतन्याने भरून गेल्याचे जाणवले. मला नामजप (उपाय) करण्यापूर्वी पुष्कळ त्रास होत होता, तरीही ईश्‍वराच्या कृपेने मला एवढी चांगली अनुभूती आली ! पूर्वी मला श्रीकृष्णाविषयी प्रेम वाटत नव्हते; मात्र ही अनुभूती आल्यानंतर मला त्याच्याविषयी प्रेम वाटू लागले. मी त्याला प्रार्थना करून तसे सांगितले. तेव्हापासून मी प्रत्यक्ष ईश्‍वराला प्रार्थना करण्याऐवजी श्रीकृष्णाला प्रार्थना करण्याचा प्रयत्न करते.’

– बारबारा आराउजो, ब्राझिल (२७.१.२०१५)

४.ध्यानमंदिरातील सिंहावर आरूढ असलेल्या दुर्गामातेच्या मूर्तीकडे पाहिल्यावर पुष्कळ चैतन्य जाणवणे आणि ती मूर्ती सजीव असल्याचे वाटणे 

‘१८.१०.२०१७ या दिवशी सकाळी ७.४५ वाजता मी ध्यानमंदिरात गेले होते. ध्यानमंदिरात दुर्गामातेची सिंहावर आरूढ असलेली मूर्ती आहे. त्या मूर्तीकडे पाहिल्यावर मला पुष्कळ चैतन्य जाणवत होते आणि आनंदही मिळत होता. थोड्या वेळाने त्या ‘मूर्तीतील सिंह आणि त्याची आयाळ हलत आहे अन् त्याचा श्‍वासोच्छ्वास चालू आहे’, असे मला जाणवले. आणखी निरीक्षण करून पाहिले असता ‘देवीचे हात आणि केस हलत आहेत’, असेही मला जाणवले.’

– कु. मानसी वाडेकर, रत्नागिरी (२१.१०.२०१७)

 

रामनाथी आश्रमात आल्यावर पुणे येथील श्री. आकाश
अंबिलवादे यांना शिकायला मिळालेली सूत्रे आणि आलेल्या अनुभूती

१. अन्नपूर्णा कक्षात सेवा करतांना शिकायला मिळालेली सूत्रे

१ अ. भांडी घासण्याची सेवा जमेल का ?, असा प्रश्‍न पडणे, एका साधकाने भांडी घासायला शिकवणे आणि ही सेवा केल्याने अहं लवकर न्यून होईल, असा विचार मनात येणे

९.६.२०१७ या दिवशी मी सनातन वैकुंठात (रामनाथी आश्रमात) आलो. १०.६.२०१७ या दिवसापासून मी स्वयंपाक गृहात (अन्नपूर्णाकक्ष) सेवेला आरंभ केला. मला काहीच येत नसल्यामुळे ही सेवा जमेल का ?, असा प्र्रश्‍न मला पडला. मी गुरुस्मरण करून सेवेला आरंभ केला. एका साधकाने भांडी कशी घासतात ?, हे मला शिकवले. तेव्हा गुरूंच्या चरणांजवळ जायचे आहे, तर भांडी घासल्याने अहं लवकर न्यून होणार आहे, असा विचार माझ्या मनात आला.

१ आ. स्वयंपाकगृहात सेवा करतांना बर्‍याच गोष्टी शिकायला मिळणे आणि रामनाथी आश्रमासारखे व्यवस्थापन पृथ्वीवरील कोणत्याही आस्थापनात नाही, हे लक्षात येणे

माझे एम्.बी.ए.चे (व्यवस्थापनाचे) शिक्षण झाले आहे, तर मला स्वयंपाक करायला कसे जमेल ? असा विचार माझ्या मनात येत होता. आधुनिक वैद्या (कु.) आरती तिवारी यांनी मला  सांगितले, तुम्ही व्यवस्थापनाचे शिक्षण घेतले ना ? आता स्वयंपाकाच्या व्यवस्थापनाचे प्रात्यक्षिक सनातनच्या संत पू. रेखाताईंकडून शिकून घ्या. मी आजवर खासगी आस्थापनात नोकरी केली; पण जे व्यवस्थापन (मॅनेजमेंट) सनातन आश्रमात आहे, ते पृथ्वीवरच्या कुठल्याच आस्थापनात नाही. कुठली वस्तू कुठे ठेवावी ? भाज्या चिरतांना काटकसर कशी असावी ?, अशा पुष्कळ गोष्टी मला शिकायला मिळाले.

२. आलेल्या अनुभूती

२ अ. अन्नपूर्णा कक्षात सेवा करतांना आलेल्या अनुभूती

१. जेव्हा मी बटाटे निवडायला घेतले, तेव्हा मला संपूर्ण गोणीमध्ये दैवी कण दिसत होते.

२. सेवा करतांना माझ्या पायाला जोराचा मार लागून रक्त आले; पण काही वेळातच वेदना दूर होऊन मला चालता येऊ लागले.

संदर्भ : दैनिक सनातन प्रभात