गुजरातमधील ‘द्वारकाधीश’ मंदिर आणि द्वारकापीठ

‘१९.३.२०१९ या दिवशी मयन महर्षींनी पू. (डॉ.) ॐ उलगनाथनजी यांच्या माध्यमातून सांगितल्याप्रमाणे २२.३.२०१९ या दिवशी सद्गुरु (सौ.) अंजली गाडगीळ यांनी गुजरातमधील गणपतिपुरा येथील सिद्धीविनायक मंदिरात जाऊन दर्शन घेतले. यानंतर पू. (डॉ.) ॐ उलगनाथनजी यांनी सांगितले, ‘‘सद्गुरु (सौ.) अंजली गाडगीळ यांनी गुजरात येथील श्रीकृष्णाशी संबंधित क्षेत्रे, सारंगपूर येथील कष्टभंजन हनुमान मंदिर आणि द्वारका येथे जाऊन दर्शन घ्यावे.’’ महर्षींनी सांगितल्याप्रमाणे सद्गुरु (सौ.) अंजली गाडगीळ यांनी २२ ते २४.३.२०१९ या कालावधीत गुजरात राज्याचा दौरा केला. २३.३.२०१९ या दिवशीची क्षणचित्रे येथे देत आहे.

विश्‍वकर्म्याने निर्मिलेले ७ माळ्यांचे ‘द्वारकाधीश’ मंदिर

१. श्रीकृष्णनगरी द्वारका !

१ अ. समुद्रकाठी वसलेली द्वारकानगरी !

श्रीकृष्णाने अवतार समाप्तीच्या आधी समुद्रात द्वारका बुडवली. दुर्वास ॠषींच्या शापामुळे यदुकुळाचा नाश झाला. समुद्रात बुडालेल्या द्वारकेच्या जवळ असलेल्या भूभागाला नंतर द्वारकेचे स्थान प्राप्त झाले.

१ आ. शिल्पशास्त्रकार विश्‍वकर्मा याने निर्मिलेले ‘द्वारकाधीश’ मंदिर !

श्रीकृष्णाचा पणतू वज्रनाभ याने श्रीकृष्णासाठी एक मंदिर बांधण्याचे ठरवले. त्याने त्यासाठी शिल्पशास्त्रकार विश्‍वकर्मा याला आवाहन केले. विश्‍वकर्मा याने या मंदिराची निर्मिती केली. हे मंदिर ७ माळ्यांचे आहे. त्यावरील सर्व शिल्पकाम दैवी आहे. ‘विश्‍वकर्मा याने स्वर्गलोकात या मंदिराची निर्मिती करून मंदिराला एखाद्या उल्कापाताप्रमाणे एका रात्रीत द्वारकेत आणले’, असे सांगितले जाते.

द्वारकाधीश मंदिरातील ‘द्वारकाधीश’ नावाने जगविख्यात असलेली श्रीकृष्णमूर्ती

१ इ. मंदिरावर असलेला धर्मध्वज आणि मंदिराचे ‘मोक्षद्वार’ अन् ‘स्वर्गद्वार’ !

श्रीकृष्णाने द्वारकानगरी वसवली; म्हणून येथील मंदिरातील श्रीकृष्णाच्या मूर्तीला ‘द्वारकाधीश’ या नावाने संबोधतात. मंदिराच्या मुख्य कळसावर एक मोठा धर्मध्वज आहे. हा धर्मध्वज दिवसातून ५ वेळा पालटण्यात येतो. मंदिराच्या उत्तरेकडे असलेल्या द्वाराला ‘मोक्षद्वार’ असे म्हणतात आणि दक्षिण द्वाराला ‘स्वर्गद्वार’ असे म्हणतात.

डावीकडून श्री. विनायक शानभाग, श्री. दिवाकर आगावणे, सद्गुरु (सौ.) अंजली गाडगीळ, श्री. सत्यकाम कणगलेकर आणि श्री. स्नेहल राऊत

२. द्वारकापीठ येथील चंद्रमौलीश्‍वर शिवलिंगाचे दर्शन घेणे

२३.३.२०१९ या दिवशी सद्गुरु (सौ.) अंजली गाडगीळ आणि दौर्‍यातील साधक यांनी द्वारकाधीश मंदिरात जाऊन श्रीकृष्णाचे दर्शन घेतले. या मंदिराला लागूनच आद्य शंकराचार्यांनी स्थापन केलेले द्वारकापीठ आहे. या ठिकाणी शंकराचार्यांच्या मठात आद्य शंकराचार्यांनी दिलेल्या नीलमण्यातील चंद्रमौलीश्‍वर शिवलिंगाचे दर्शन घेतले.

३. ‘बेट द्वारका’ येथे जाण्याचे नियोजन होणे

या वेळी मंदिराचे एक पुजारी श्री. महेश्‍वर यांनी दुसर्‍या दिवशी द्वारकेपासून ३० कि.मी. दूर असलेल्या ‘बेट द्वारका’ येथे घेऊन जाणार असल्याचे सांगितले. श्रीकृष्णाचे स्मरण करत त्या दिवशी आम्ही द्वारका येथे मुक्काम केला.’

– श्री. विनायक शानभाग, देहली (६.४.२०१९)