खोपोली येथे वाढदिवसानिमित्त उद्योजक यशवंत साबळे यांच्याकडून सनातन संस्थेच्या लघुग्रंथांचे वितरण !

खोपोली (जिल्हा रायगड) – वाढदिवस म्हणजे केवळ जल्लोष आणि पाश्चात्त्य प्रथांचे अंधानुकरण नसून तो समाजहित आणि धर्मप्रसार यांचा भाग असू शकतो, याचा आदर्श खोपोलीतील उद्योजक श्री. यशवंतशेठ लक्ष्मण साबळे यांनी घालून दिला आहे. श्री हनुमान जयंतीचे औचित्य साधून आणि त्यांच्या वाढदिवसानिमित्त त्यांनी सनातन संस्था प्रकाशित ‘श्रीरामरक्षास्तोत्र’ आणि हनुमानचालिसा’ या लघुग्रंथांच्या ५०० प्रतींचे वितरण केले.

प्रारंभी खोपोली नगर परिषदेचे नगराध्यक्ष श्री. कुलदीपक शेंडे, उपनगराध्यक्ष श्री. विक्रम साबळे, उपस्थित नगरसेवक, नगरसेविका आणि इतर मान्यवर यांना हा लघुग्रंथ भेट देण्यात आला. शुभेच्छा देण्यासाठी आलेल्या प्रत्येकाला त्यांनी वरीलप्रमाणे लघुग्रंथ दिले. उपस्थितांनी या उपक्रमाचे भरभरून कौतुक केले.

श्री. यशवंतशेठ साबळे म्हणाले, ‘‘या लघुग्रंथांचे वितरण करून मला समाधान आणि आध्यात्मिक आनंदही मिळाला. ग्रंथांमुळे कार्यक्रमाचे स्वरूप पूर्णपणे पालटले असून उपस्थितांमध्ये वेगळाच उत्साह आणि सात्त्विक वातावरण निर्माण झाले.’’