नांदेड येथील श्रीमती अनिता बरारा (वय ७२ वर्षे) सनातन संस्थेच्या १३८ व्या (समष्टी) संतपदी विराजमान !

साधकांनी अनुभवले आनंदाचे डोही आनंद तरंग

नांदेड, २६ फेब्रुवारी (वार्ता.) – सनातन संस्थेचे धर्मप्रचारक संत सद्गुरु नंदकुमार जाधव यांचा नांदेड येथील सर्व साधकांसाठी मार्गदर्शनपर सत्संग आयोजित करण्यात आला होता. या सत्संगात त्यांनी साधनेत भक्तीभाव वाढवण्याचे महत्त्व, तसेच त्यासाठी करावयाचे प्रयत्न यांविषयी मार्गदर्शन केले. त्याचसमवेत नांदेड येथे अनेक वर्षांपासून साधना करणार्‍या काही साधकांचे साधना प्रवासातील अनुभवकथन प्रश्नोत्तर स्वरूपात घेतले. अनुभवकथन घेत असतांना सच्चिदानंद परब्रह्म डॉ. आठवले यांच्या प्रतीचा उत्कट शरणागतभाव, दृढ श्रद्धा, तळमळ, प्रीती, विनम्रता, सेवकभाव, शांत आणि स्थिर वृत्ती असलेल्या श्रीमती अनिता बरारा (वय ७२ वर्षे) या ७१ टक्के आध्यात्मिक पातळी गाठून सनातनच्या  १३८ व्या (समष्टी) संतपदी विराजमान झाल्याची आनंदवार्ता उत्तर महाराष्ट्र आणि मराठवाडा क्षेत्रातील धर्मप्रचारक सद्गुरु नंदकुमार जाधव यांनी दिली. साधकांसाठी ही आनंदाची पर्वणी ठरल्यामुळे येथील सर्व साधक भावविभोर झाले होते.

हा आनंददायी सोहळा नांदेड येथील ‘रामा कृष्णा इंटरनॅशनल हॉटेल’च्या सभागृहात पार पडला. या मंगलप्रसंगी सनातनच्या साधिका श्रीमती शालिनी गोजे यांनी पू. (श्रीमती) अनिता बरारा यांना पुष्पहार घालून, तर सद्गुरु नंदकुमार जाधव यांनी सच्चिदानंद परब्रह्म डॉ. आठवले यांचे छायाचित्र आणि भेटवस्तू देऊन त्यांचा सन्मान केला.