गुरुपौर्णिमेनिमित्त संतसंदेश !

पिंगुळी येथील प.पू. विनायक (अण्णा) राऊळ महाराज यांचा संदेश

‘आता सर्वांकडून ईश्‍वरभक्ती होऊ दे’, हीच गुरुचरणी प्रार्थना !

‘प्रत्येक वर्षी गुरुपौर्णिमा महोत्सवात माझे गुरु प.पू. राऊळ महाराजांच्या कृपेने सहस्रो भक्त भक्तीभावाने पिंगुळी येथील महाराजांच्या आश्रमात येतात, दर्शन घेतात आणि महाप्रसादाचा लाभ घेतात; परंतु या वर्षी तसे होणार नाही; कारण ईश्‍वरी कोप झाला आहे. ईश्‍वरी कोप होण्याचे प्रमुख कारण म्हणजे समाज ईश्‍वरभक्तीच विसरत चालला आहे. ‘पैसा म्हणजे ईश्‍वर’, अशी भावना सर्वसामान्य समाजाची झाल्यामुळे सर्व नीतीमत्ता गुंडाळून फक्त धन कमावणे, हेच त्याचे एकमेव ध्येय बनले आहे. आज कोरोनाच्या प्रादुर्भावामुळे राव आणि रंक एकाच ठिकाणी येऊन उभे राहिले आहेत. कोरोना गरीब-श्रीमंत असा भेदभाव करत नाही. ‘केवळ पैसा आपल्या जिवाचे रक्षण करू शकत नाही’, याची सर्वांना जाणीव होऊ लागली आहे. सर्वांना ईश्‍वरभक्तीचे महत्त्व समजू लागले आहे. ‘आता सर्वांकडून ईश्‍वरभक्ती होऊ दे’, अशी या गुरुपौर्णिमेच्या निमित्ताने माझे गुरु प.पू. राऊळ महाराजांच्या चरणी प्रार्थना !’

– प.पू. विनायक (अण्णा) राऊळ महाराज, पिंगुळी, जिल्हा सिंधुदुर्ग. (१०.६.२०२०)

 

कुडाळ येथील प.पू. घडशी महाराज यांचा संदेश

या घोर आपत्काळापासून रक्षण होण्यासाठी सर्वांनी परात्पर गुरु डॉ. आठवले यांना शरण जाऊया !

‘सद्यस्थिती पहाता घोर आपत्काळाला आरंभ झालेला आहे. या आपत्काळाविषयी गेल्या १५ ते २० वर्षांपासून सनातन संस्था आणि अनेक संत सातत्याने जनप्रबोधन करत आहेत. समाजाने त्याचे गांभीर्य वेळीच लक्षात न घेतल्यामुळे कोरोनासारख्या महामारीचा सामना करण्याची कुवत त्याच्यात निर्माण झाली नाही आणि त्यावरील उपाय शोधण्याची बुद्धीही खुंटली आहे. या महामारीमुळे लाखो लोक मृत्यूमुखी पडत असून संपूर्ण समाज हतबल झाला आहे.

आपत्काळाचा हा तर आरंभ आहे. पुढे किती भयानक आपत्काळ असणार, याची समाजाला कल्पनाच नाही. हे सर्व ईश्‍वराच्याच इच्छेने घडत आहे. फक्त त्याच्या नामानेच या आपत्काळात आपण तरून जाऊ शकतो. त्याचे भक्त बनलो, तरच या आपत्काळातून आपली सुटका होऊ शकते.

आज जगभरात विज्ञानाचा उदो उदो करणारे विज्ञानवादी पुरोगामी विचारवंत विज्ञानाच्या माध्यमातून ही महामारी का थांबवू शकले नाहीत ? त्यांची मती का कुंटीत झाली ? सध्या जे काही घडत आहे, ते त्यांच्या बुद्धीपलीकडचे आहे. येथे विज्ञानही अपुरे पडत आहे.
सहस्रो वर्षांपासून आयुर्वेदीय उपचारपद्धत प्रचलित आहे. आयुर्वेदात संजीवनीसारख्या वनस्पती होत्या, जिच्यामध्ये व्यक्तीला जिवंत करण्याचे सामर्थ्य होते. अशा वनस्पतींनाच या विज्ञानवाद्यांनी कालबाह्य ठरवले आणि आता संपूर्ण जगाला मृत्यूच्या खाईमध्ये घेऊन चालले आहेत. समाजाने विचार करण्याची वेळ आली आहे. वनौषधी लावा म्हणून जगभरातील आयुर्वेदाचार्य आणि सनातन संस्था सातत्याने प्रबोधन करत आहेत. त्याचे गांभीर्य लक्षात घेऊन पुढील वाटचाल करणे आवश्यक आहे अन्यथा संपूर्ण समाजाची अधोगती होईल.

अजूनही वेळ गेलेली नाही. सनातन संस्थेचे संस्थापक परात्पर गुरु डॉ. आठवले हे अवतारी पुरुष आहेत. जगदोद्धाराचे कार्य त्यांनी हाती घेतले आहे. ते कार्य होणारच आहे. आपण सर्वांनी त्यांना शरण जाऊन नामसाधना करूया आणि त्यांच्या मार्गदर्शनाखाली मार्गक्रमण करूया.’

॥ दिगंबरा दिगंबरा श्रीपाद वल्लभ दिगंबरा ॥

– प.पू. घडशी महाराज, नवनाथ श्रद्धास्थान, मुळदे, तालुका कुडाळ, जिल्हा सिंधुदुर्ग. (१०.६.२०२०)

 

गुरुपौर्णिमेनिमित्त प.पू. दास महाराज आणि पू. (सौ.) लक्ष्मी (माई) नाईक यांचा संदेश

साधकांनो, सध्याचा आपत्काळ हा सुवर्णसंधीचा काळ
असल्याने परात्पर गुरु डॉ. आठवले यांची कृपा संपादन करण्यासाठी प्रयत्न करा !

गुरुर्ब्रह्मा गुरुर्विष्णुः गुरुर्देवो महेश्‍वरः ।
गुरुः साक्षात् परब्रह्म तस्मै श्रीगुरवे नमः ॥

१. आपत्काळाने स्थुलातून तांडव आरंभले असून त्यात साधना करणारे जीवच गुरुकृपेने तरून जाणार असणे

‘साधकांनो, परब्रह्मस्वरूप गुरुदेवांनी ज्या भीषण आपत्काळाविषयी आपल्याला सांगितले होते, त्याचा आरंभ जून २०१९ पासूनच झाला आहे. महापूर, अ‍ॅमेझॉन अभयारण्याला लागलेली आग आणि नोव्हेंबर २०१९ मध्ये प्रकटलेला कोरोना विषाणू या माध्यमातून आपत्काळाने स्थुलातून तांडव आरंभले आहे. यापुढे हा काळ आणखी तीव्र होईल. महापुरासह भूकंप, सुनामी, देशांतर्गत गृहयुद्धे अन् त्यानंतर महाभयंकर असे तिसरे महायुद्ध या स्वरूपात तो प्रकट होईल. यात पृथ्वीवरील एक तृतीयांश मानवजात नष्ट होईल. केवळ साधना करणारे जीव या काळात गुरुकृपेने तरून जातील.

२. परात्पर गुरुदेवांचे कालातीत ज्ञान आचरणात आणणे आवश्यक !

‘पृथ्वीवर आपत्काळ येणार’, असे अनेक संतांनी यापूर्वीच सांगून ठेवलेले आहे; मात्र येणार्‍या आपत्काळात तरून जाण्यासाठी काय करावे, याची पूर्वसिद्धता एकमेव परात्पर गुरुदेव डॉ. आठवले यांनीच करून घेतली आहे. ‘आपत्काळाला सामोरे कसे जावे ?’, याविषयीची ग्रंथमालिकाच त्यांनी सिद्ध केली आहे. त्यानुसार आचरण केल्यास पृथ्वीवरील कोणताही जीव आपत्काळाला सहजपणे तोंड देऊ शकतो. यातूनच परात्पर गुरुदेवांचे कालातीत ज्ञान सिद्ध होते.

३. साधकांनो, संधीकालाचे महत्त्व लक्षात घ्या !

पृथ्वीवर आलेला भीषण आपत्काळ हा खरेतर साधकांसाठी संपत्काल आहे; कारण हा आपत्काळ म्हणजे दोन युगांमधील संधीकाल आहे. संधीकालात (उदा. सूर्योदय आणि सूर्यास्त या काळात) साधना करणार्‍यांची साधना अतिशय जलद गतीने होत असते. परात्पर गुरुदेवांनी याचे महत्त्व सांगतांना ‘अन्य काळात १ सहस्र वर्षे साधना केल्यानंतर जे फळ प्राप्त होते, ते संधीकाळात काही कालावधीत प्राप्त होते’, असे म्हटले आहे. त्यामुळेच हा आपत्काळ साधकांसाठी सुवर्णसंधीकालच आहे.

४. साधकांनो, गुरुकृपायोगानुसार आचरण करून साधनेचा वेग वाढवा !

परात्पर गुरुदेवांनी विहंगम मार्गाने प्रगती करून देणार्‍या गुरुकृपायोगाची निर्मिती केली आहे. हा मार्ग म्हणजे सर्व योगमार्गांचे सार आहे, हे साधकांना ठाऊकच आहे. असा योगमार्ग आपल्याला लाभला आहे. त्यात संधीकाल म्हणजे दुग्धशर्करायोगच आहे. गुरुकृपायोगाचे प्रामाणिकपणे आचरण केल्यास अगदी अल्प कालावधीत अनेक जन्मांचे पापकर्म नष्ट होऊन आपली प्रगती होऊ शकते. हे साधकांनी लक्षात घेऊन साधनेचा वेग वाढवला पाहिजे.

५. श्रीसत्शक्ति (सौ.) बिंदा सिंगबाळ आणि श्रीचित्शक्ति (सौ.) अंजली गाडगीळ यांच्या माध्यमातून परात्पर गुरुदेवांच्या रूपातील श्रीमद्नारायण आपत्काळात साधकांना तारेल !

साधकांचे आपत्काळात रक्षण व्हावे आणि त्यांची आध्यात्मिक उन्नती जलदगतीने व्हावी, यासाठी श्रीमद्नारायण आपल्या श्रीसत्शक्ति आणि श्रीचित्शक्ति यांसहित प्रकट झाला आहे. श्रीसत्शक्ति सद्गुरु (सौ.) बिंदा सिंगबाळ आणि श्रीचित्शक्ति (सौ.) अंजली गाडगीळ यांच्या माध्यमातून परात्पर गुरुदेव रूपात वावरणारा श्रीमद्नारायण आपत्काळात साधकांना तारणार आहेच, तसेच ईश्‍वरी राज्याची, अर्थात् हिंदु राष्ट्राची स्थापनाही करणार आहे. ही दोन्ही कार्ये केवळ त्यांच्या संकल्पानेच होणार आहेत. त्यासाठी साधकांना काही करावे लागणार नाही. साधकांनी केवळ स्वत:ची प्रगती करून घ्यायची आहे.

६. कोरोनाच्या पार्श्‍वभूमीवर झालेला हिंदु राष्ट्राचा आरंभ !

हिंदु राष्ट्राची स्थापना परात्पर गुरुदेवांच्या संकल्पाने कशी होऊ शकेल, याची झलक सध्या कोरोनाच्या संसर्गानंतर अनुभवायला मिळते. महासत्ता होण्याच्या राक्षसी महत्त्वाकांक्षेने पछाडलेल्या चीनने ‘कोरोना’ नामक मायावी शक्ती प्रकट करून जगावर सोडली. या शक्तीने आतापर्यंत जगभरातील लाखो जणांचे जीव घेतले आहेत. भारतातील चैतन्याचे स्रोत असलेली मंदिरेे बंद करावी लागली. त्रिलोकावर राज्य करण्याच्या महत्त्वाकांक्षेने पछाडलेल्या रावणाने जसे ३३ कोटी देवतांना बंदी बनवले होते, तसेच या शक्तीने देवतांना बंदी बनवले; मात्र हे घडत असतांना दैवी शक्तींचा चमत्कारही पहायला मिळाला. अन्य देशांच्या तुलनेत पुण्यभूमी भारतात मायावी शक्तीला अधिक प्रभाव पाडता आलेला नाही. विश्‍वात सकारात्मक गोष्टी दिसून आल्या. जगभरातील लोक हिंदु संस्कृतीचे पालन करायला लागले. हस्तांदोलन सोडून नमस्कार करायला शिकले. हाच हिंदु राष्ट्राचा आरंभ आहे.

७. जागतिक आरोग्य संघटना आणि पाश्‍चात्त्य देशांतील संशोधक यांनी घालून दिलेले नियम हिंदु संस्कृतीशी संबंधित असणे

जो धर्माचरण करतो, त्याचे रक्षण धर्म (ईश्‍वर) करतो. ‘धर्माचरण करणार्‍याला कोरोना स्पर्शही करू शकत नाही’, असे म्हटल्यास वावगे ठरणार नाही. कोरोनावर अद्याप लस निर्माण झालेली नाही. सध्या कोरोना होऊ न देणे, हाच त्यापासून वाचण्याचा एकमेव उपाय आहे. त्यासाठी जागतिक आरोग्य संघटनेने मार्गदर्शक तत्त्वे घोषित केली आहेत. पाश्‍चात्त्य देशांतील संशोधकांनी मोठे संशोधन करून काही नियमावली सिद्ध केली आहे. याचा अभ्यास केल्यावर ही सर्व सूत्रे हिंदूंच्याच धार्मिक कृतींचा सामान्य भाग असल्याचे स्पष्ट होते. प्राचीन काळापासून हिंदू या सूत्रांचे पालन करत आले आहेत.

८. हिंदु धर्मातील नियम अवलंबण्याच्या माध्यमातून संपूर्ण विश्‍वात हिंदु राष्ट्राच्या स्थापनेचा आरंभ झालेलाच आहे !

जे हिंदूंच्या प्राचीन धर्मग्रंथांत नियम सांगितले आहेत, तेच नियम आता पाश्‍चात्त्य जगतातील संशोधक सांगू लागले आहेत. बाहेरून आल्यानंतर घरात येण्याआधी हात-पाय धुणे, ही भारतियांची सहज प्रवृत्ती होती. अलीकडे पाश्‍चात्त्यांच्या आहारी गेल्याने त्याचा विसर पडला होता. जागतिक आरोग्य संघटनेने आता तेच नियम सांगितले आहेत. कोरोनाचे निवारण व्हावे, यासाठी अमेरिकेचे राष्ट्राध्यक्ष डोनाल्ड ट्रम्प यांनी ‘व्हाईट हाऊस’मध्ये ब्रह्मवृंदांना बोलावून वेद शांतीपाठ करून घेतला. याचाच अर्थ संपूर्ण विश्‍वात हिंदु राष्ट्राच्या स्थापनेचा आरंभ झालेलाच आहे. त्यामुळे वर्ष २०२३ मध्ये विश्‍वात हिंदु राष्ट्राची फडकणार, हे निश्‍चित !

९. साधकांनो, गुरुदेवांच्या अखंड अनुसंधानात रहाण्याचा प्रयत्न करा !

सांगायचे तात्पर्य म्हणजे हिंदु राष्ट्राच्या स्थापनेसाठी साधकांना काहीही करावे लागणार नाही. हिंदु राष्ट्र परात्पर गुरुदेव, श्रीसत्शक्ति (सौ.) बिंदाताई आणि श्रीचित्शक्ति (सौ.) अंजलीताई यांच्या संकल्पातूनच होणार आहे. गुरुकृपायोगाचे ब्रीदच आहे, ‘गुरुकृपा हि केवलं शिष्यपरममङ्गलम् । साधकांनी केवळ त्यांची कृपा संपादन करण्यासाठी प्रयत्न करणे आवश्यक आहे. गुरुदेवांच्या अखंड अनुसंधानात रहाण्याचा प्रयत्न करा. तसे झाल्यासच तुम्ही कोरोनासारख्या मायावी शक्तींपासून आणि आगामी भीषण आपत्काळापासून वाचू शकाल.

हे श्रीमद्नारायण अवतार परात्पर गुरुदेव, श्रीसत्शक्ति (सौ.) बिंदाताई आणि श्रीचित्शक्ति (सौ.) अंजलीताई, आम्हा सर्व साधकांचे आपत्काळात रक्षण करा. आमची जलद आध्यात्मिक उन्नती करून घ्यावी, हीच आपल्या चरणी या गुरुपौर्णिमेनिमित्त प्रार्थना !’

– प.पू. दास महाराज आणि (पू.) सौ. लक्ष्मी (माई) नाईक, पानवळ-बांदा, जिल्हा सिंधुदुर्ग. (६.६.२०२०)

वर्ष २०१९

ठाणे येथील थोर संत योगतज्ञ दादाजी वैशंपायन

नेहमी सत्कर्म करून सद्गुरूंची कृपा संपादन करण्याचा प्रयत्न करा ! – योगतज्ञ दादाजी वैशंपायन

ॐ आनन्दं हिमालयं विष्णुं गरुडध्वजम् ॐ ।
ॐ शिवं दत्तं गायत्री सरस्वती महालक्ष्मी प्रणमाम्यहम् ॐ ॥

साधकांनी कोणतेही कर्म करतांना फळाची अपेक्षा न ठेवणे योग्यच; कारण सत्कर्माची चांगली फळे आणि कुकर्माची वाईट फळे, हा सृष्टीचा नियमच आहे; म्हणून यात आपल्या अपेक्षांना काहीच स्थान नाही. असे असले, तरी नेहमी सत्कर्म करत रहावे, तसेच सद्गुरूंची कृपा संपादन करण्याचा प्रयत्न करावा. सद्गुरुकृपेनेच साधकांच्या जीवनाचे कल्याण होते. आकलन न होणार्‍या समस्येसाठी साधकांना इच्छेनुरूप ईशकृपा व्हावी, हीच प्रार्थना !

 

सद्गुरु (सौ.) अंजली गाडगीळ, परात्पर गुरु
डॉ. आठवले यांच्या आध्यात्मिक उत्तराधिकारी

धर्मनिष्ठ हिंदु समाजाच्या निर्मितीसाठी प्रयत्न करा !
– सद्गुरु (सौ.) अंजली गाडगीळ, परात्पर गुरु डॉ. आठवले यांच्या आध्यात्मिक उत्तराधिकारी

प्रजेच्या पात्रतेप्रमाणे तिला राज्यकर्ते मिळतात, हा धर्माचा सिद्धांत आहे. रामराज्यातील प्रजा धर्माचरणी होती; म्हणून तिला प्रभु श्रीरामासारखा आदर्श राजा आणि आदर्श रामराज्य मिळाले. हिंदु राष्ट्राच्या (ईश्‍वरी राज्याच्या) स्थापनेसाठीही संपूर्ण हिंदु समाज धर्ममय झाला पाहिजे. हिंदूंना धर्मशिक्षित करणे, हिंदूंची लहान मुले आणि युवक यांच्यावर धर्मसंस्कार करणे, धर्माचरणी हिंदूंना धर्मरक्षणार्थ संघटित करणे, अशा कृतींद्वारे हिंदु समाजाला धर्मनिष्ठ बनवण्याचे प्रयत्न आपण तळमळीने आणि भावपूर्णपणे केले पाहिजेत. तसे झाले, तर हिंदु समाज धर्ममय होण्यास प्रारंभ होईल. हिंदु समाज जितक्या लवकर धर्ममय होईल, तितके लवकर हिंदु राष्ट्र येईल. या गुरुपौर्णिमेनिमित्त धर्मनिष्ठ हिंदु समाजाच्या निर्मितीसाठी प्रयत्न करण्याचा संकल्प करूया !

 

सद्गुरु सत्यवान कदम (सनातनचे सद्गुरु)

हिंदु धर्म आणि संस्कृती यांचे रक्षण करणे, ही काळानुसार
समष्टी साधना ! – सद्गुरु सत्यवान कदम (सनातनचे सद्गुरु), सिंधुदुर्ग

भारतात हिंदूंची एकता आणि सामर्थ्य वाढू नये; म्हणून काही तथाकथित सेक्युलरवादी, कम्युनिस्ट, इस्लामी आणि ख्रिस्ती संस्था, तसेच काही धर्मद्रोही संघटना अन् राजकीय पक्ष आज हिंदुत्वनिष्ठांवर खोटे आरोप करून त्यांना अडकवत आहेत. मुसलमान आणि ख्रिस्ती यांच्या मतांसाठी हपापलेले राजकीय पक्ष देशाचे वाटोळे झाले, तरी चालेल; पण स्वतःचा स्वार्थ साधला पाहिजे, अशा वृत्तीचे आहेत. मतांच्या या राजकारणात हिंदु समाजाला विघटित आणि दुबळा करून टाकण्याची जणू स्पर्धाच लागली आहे. तथाकथित बुद्धिवंत, विचारवंत, लेखक, साहित्यिक यांचाही सेक्युलरवादाच्या नावावर यामध्ये भरपूर सहभाग आहे. इतिहासाचे विकृतीकरण करून हिंदूंना स्वाभिमानशून्य बनवण्याचा हा मोठा योजनाबद्ध प्रयत्न आहे, अशा परिस्थितीत आपण हिंदूंनी जागृत होऊन हिंदूसंघटन करणे, हिंदु धर्म आणि संस्कृती यांचे रक्षण करणे, त्याचसमवेत भ्रष्टाचार अन् अनैतिकता दूर करण्यासाठी प्रयत्न करणे, ही आपली काळानुसार समष्टी साधना आहे.

 

प.पू. उल्हासगिरी महाराज

॥ चैतन्य गगनगिरी नाथाय नमः ॥

देहरूपी नव्हे, तर तत्त्वरूपी गुरुदेवांच्या कार्यात मनाला व्यापक बनवून गुरुकृपा
संपादन करूया ! – प.पू. उल्हासगिरी महाराज, मठाधिपती, ओणी-कोंडिवळे, ता. राजापूर, जि. रत्नागिरी.

गुरुकृपा हि केवलं शिष्यपरममङ्गलम् ।, म्हणजे श्रीगुरुकृपा झाली, तर शिष्याचे परममंगलच होते. गुरुदेवांची कृपा संपादन करण्यासाठी शुद्ध भाव, आज्ञापालन, तळमळ, नम्रता, चिकाटी, लीनता, सहनशक्ती, धैर्य, आदर, प्रेम, धर्मपालन, नीतीमूल्यांचे आचरण, अशा अनेक सद्गुणांची आवश्यकता असते. तसेच स्वत:च्या मनाने साधना करणे, इतरांना न्यून लेखणे, आपले तेच खरे करणे, हेकेखोरपणा, राग, द्वेष, मत्सर, इर्षा, भेदभाव, अहं, माझेच गुरु श्रेष्ठ दुसर्‍याचे कनिष्ठ, यांसारख्या गुरुकृपा होण्यामधील अडथळे असणार्‍या स्वभावदोषांना रोखणे आवश्यक आहे. त्याचसमवेत धर्माची सद्य:स्थिती पहाता राष्ट्र आणि धर्म यांच्या प्रती कर्तव्यपरायण असणाराच खर्‍या अर्थाने गुरुकृपेला पात्र ठरू शकतो. गुरुदेवांनी दिलेल्या मार्गाने मार्गक्रमण करत असतांना प्रतिकूल परिस्थितीवर मात करत अडथळ्यांना सामोरे जात आपल्याला हा मार्ग चालायचा आहे. देहरूपी नव्हे, तर तत्त्वरूपी गुरुदेवांच्या कार्यात मनाला व्यापक आणि विशाल बनवून गुरुकृपा संपादन करूया ! यामुळेच संत म्हणतात, मन होता विशाल । गुरुकृपा होते तात्काळ !

 

पू. मंगला खेर (सनातनच्या संत)

कोणतीही सेवा गुरुसेवा म्हणून करा ! – पू. मंगला खेर (सनातनच्या संत), रत्नागिरी

ध्यानी-मनी गुरूंचे स्मरण असावे. भाव तेथे देव, या उक्तीप्रमाणे देव आपल्याला भेटेलच; मात्र आता परात्पर गुरु डॉक्टरांसारखे गुरु लाभले आहेत. त्यामुळे मिळालेली कोणतीही सेवा गुरूंना आवडेल अशी करून त्यांचा लाभ करून घ्यावा. आपली प्रतिदिनची देवपूजासुद्धा प्रेमाने करा. तन आणि मन नामजपाला जोडा. ते जोडले गेले की, परात्पर गुरु डॉक्टर आठवले साधकांची प्रगती लवकर करून घेतील. आपल्यामध्ये अहं असतो, तो आपण घालवला पाहिजे. साधकांनी स्वत:चे दोष शोधून काढून ते न्यून करायला हवेत, तरच स्वभावदोष निर्मूलन प्रक्रियेचा आपल्याला लाभ होईल.

 

पू. चंद्रसेन मयेकर (सनातनचे संत)

गुरुदेवांना अपेक्षित अशी साधना केली, तरच भीषण
आपत्काळात आपण टिकू ! – पू. चंद्रसेन मयेकर (सनातनचे संत), राजापूर (रत्नागिरी)

द्रष्टे संत आणि ज्योतिषी यांनी १ – २ वर्षांत भीषण आपत्काळाला प्रारंभ होणार आहे, असे सांगितले आहे. विष्णुस्वरूप परात्पर गुरुदेवांनीही महाभयंकर असा आपत्काळ येणार असून त्यात टिकून रहायचे असेल, तर तीव्र साधनाच करावी लागेल, असे सांगितले आहे. यासाठीच साधकांनी आतापासूनच गुरुदेवांनी सांगितलेली गुरुकृपायोगानुसार साधना तळमळीने आणि परिपूर्ण करावी. साधना गुरुदेवांना अपेक्षित अशी केली, तरच या भीषण आपत्काळात आपण टिकू शकणार आहोत. सध्याच्या या रज-तम प्रधान वातावरणात जगणे कठीण आहे. यासाठी साधकांनी श्रद्धेने आणि झोकून देऊन, तन-मन-धन अर्पण करून साधना करणे, हाच एकमेव उपाय आहे. परम पूज्य गुरुदेव अनेक संतांच्या माध्यमातून सातत्याने आपल्याला साधनेविषयी सांगत आहेत. सध्या काही साधक साधनेकडे जसे लक्ष द्यायला पाहिजे, तसे देत नाहीत. तरी साधकांनी साधनेचे महत्त्व गांभीर्याने लक्षात घेऊन आणि जोरदार साधना करून गुरूंचे मन जिंकावे. साधकांची सध्याची साधनेची स्थिती पाहून श्रीगुरूंच्या कृपेने हे सांगावे लागत आहे. साधकांनी याचा विचार करून साधनेला मनापासून प्रारंभ करावा !

 

पू. श्रीकृष्ण आगवेकर (सनातनचे संत)

स्वधर्माच्या अस्तित्वासाठी हिंदूंनी धर्मकार्य करण्यास
प्राधान्य द्यायला हवे ! – पू. श्रीकृष्ण आगवेकर (सनातनचे संत), चिपळूण (रत्नागिरी)

पुढे येणार्‍या आपत्काळात नामस्मरणाला सर्वांनी अधिकाधिक महत्त्व द्यावे. नामस्मरणाने आपली अधिकाधिक प्रगती करून घ्यावी. नामस्मरणामुळे देवही तरले आहेत. तर त्याच नामाची कास धरून आपणही हा भवसागर तरून जावे. गुरूंप्रती अधिकाधिक प्रेमभाव वाढावा, यासाठी प्रत्येक साधकाने अधिकाधिक सेवा आणि गुरूंनी सांगितलेली साधना करावी. येणारा आपत्काळ हा हिंदूंकरता निर्णायक असा काळ असून स्वधर्माच्या अस्तित्वासाठी हिंदूंनी धर्मकार्य करण्यास प्राधान्य द्यायला हवे. धर्माचे अस्तित्व अबाधित राहिले, तरच आपले अस्तित्व टिकून रहाणार आहे !


वर्ष २०१८

पू. (श्रीमती) सुशीला शहाणे

 

मिळेल ती सेवा गुरूंना आवडेल अशी करून
गुरुपौर्णिमेचा लाभ करून घेऊया ! – पू. (श्रीमती) सुशीला शहाणे , रत्नागिरी

‘काळानुरूप त्रासाची तीव्रता वाढत आहे. त्यामुळे जनसामान्यांच्या जीवनात अनेक प्रकारचे अडथळे आणि अडचणी येत आहेत. सामान्य जीव चहुबाजूंनी ग्रासला आहे. त्याला काय करू नी काय नको, असे झाले आहे. दिवसागणिक त्याच्या अडचणीत वाढच होत आहे. येणारा काळ याहूनही भयाण असणार आहे. त्याला सामोरे जाण्यासाठी आणि त्यातून जिवंत रहाण्यासाठी केवळ आणि केवळ भगवंताची कास धरणे, हा एकमेव पर्याय आहे. पुढील काळात साधना करणेदेखील अशक्य होणार आहे, तसेच गुरुपौर्णिमा साजरी करायला मिळेल कि नाही, हे त्या देवालाच ठाऊक आहे. देवाच्या कृपेने आज जी सेवेची संधी आपल्याला मिळाली आहे, तिचा प्रत्येकाने पुरेपूर लाभ करून घेऊया. त्यासाठी नामजप आणि प्रार्थनेसह मिळेल ती सेवा गुरूंना आवडेल अशी करून या गुरुपौर्णिमेचा सहस्रपटीने लाभ करून घेऊया. भगवंत प्रत्येकाला तशी बुद्धी आणि प्रेरणा देवो, हीच ईशचरणी प्रार्थना !’

पू. (श्रीमती) मंगला खेर

 

आपल्याला हिंदु राष्ट्र आणायचे आहे ! – पू. (श्रीमती) मंगला खेर , रत्नागिरी

‘आपल्याला हे लक्षात ठेवायचे आहे की, हिंदु राष्ट्र आणायचे आहे. ‘हिंदु राष्ट्र येणार आहे, हे निश्‍चित आहे. त्यासाठी आपल्याला प्रयत्न करायचे आहेत’, असे गुरुमाऊलीने आपल्याला सांगितले आहे. धर्मरक्षणासाठी सनातन संस्था आणि हिंदु जनजागृती समिती यांची स्थापना करण्यात आली आहे. समाजाला त्यांची प्रचीती येईलच !’

(पू.) बाबा (सदानंद) नाईक

 

गुरुपौर्णिमेनिमित्त आजच गुरूंना मन पूर्णतः अर्पण करा !

‘साधकांनो, गुरुपौर्णिमेनिमित्त तन, मन आणि धन अर्पण केल्यास ते गुरुचरणांपर्यंत पोहोचते. उद्या गुरुपौर्णिमा आहे. त्यानिमित्त गुरूंना आजच मन पूर्णतः अर्पण करा. तुमचे इतरांशी जुळते कि नाही ? जुळत नसेल, तर ते आजच जुळवून घ्या; कारण इतरांशी जुळत नसल्यास ते गुरूंना आवडणार नाही. तसेच आपले जरी एका साधकाशी जुळत नसेल, तरी आपण आनंदी राहू शकत नाही. त्यामुळे आपल्याला प्रत्येकाशी जुळवून घेता आले पाहिजे.’

– (पू.) बाबा (सदानंद) नाईक, सनातन आश्रम, रामनाथी, गोवा. (२६.७.२०१७)